Hues a condena Garage Centraal Aruba den un caso unda un cliente a cumpra un Porche pero despues a descubri cu e garage no tabata un dealer oficial di e marca di auto.
Den e veredicto cu a sali awe hues ta papia di un ‘kunstgreep’ pues un acto fabrica unda e compania tabatin un cooperacion cu Prowin na Corsou cu si ta un representante oficial di e marca. For di nan Garage Centraal tabata haya e autonan, sinembargo na Aruba e garage ta haci comosifuera e mes ta e e dealer oficial. Esaki por a mira den diferente promocion y tabatin un simbolo di e marca riba nan muraya.
Ora e cliente Rene Kan a haya problema cu su Porche na 2014 y despues haya sa cu e garage no tabata un dealer oficial, Garage Centraal diripiente a stop di actua como representante di Porche.
Den e veredicto por lesa cu hues a bari tur argumento di e compania for di mesa y ta haya cu Garage Centraal a actua ilegal como representante, maldirigi su clientenan y e cooperacion cu e compania di Corsou ta mustra fraudulente. Su conclusion ta cu e cliente por entrega su auto y haya su placa bek.
No ta conoci ainda si tin mas cliente cu a cumpra un Porche na e garage aki y kier nan placa bek.
Por lesa e veredicto completo aki.
