(AP)—E hues di Colorado cu ta evaluando e prome caso grandi pa prohibi ex-Presidente Donald Trump for di e lista di votamento pa e eleccion presidencial otro aña a ordena ayera un prohibicion pa menasa y intimidacion den e caso, bisando cu e seguridad di esnan evolvi—incluyendo su mes y su empleadonan—tabata necesario mientras cu e proceso legal ta avansa.
“Mi ta compronde completamente tur hende su preocupacionnan pa e partidonan, e abogado, y pa ta honesto, mi mes y mi empleadonan basa riba kico nos a mira den otro casonan,” Hues di districto, Sarah B. Wallace, a bisa ayera mientras cu e ta aproba e orden protectivo.
E orden ta prohibi partidonan den e caso haci declaracionnan di menasa of intimidacion. Scott Gessler, un ex-secretaria di estado di Colorado cu ta representando Trump den e caso, tabata en contra di esaki. El a bisa cu un orden protectivo no ta necesario pasobra ya esakinan ta prohibi pa ley.
Abogadonan a busca pa e orden aki pa e grupo liberal Citizens for Responsibilities and Ethics na Washington, cual ta buscando pa descualifica Trump for di e lista di eleccion bao di un clausula di e diescuatro amendamento di e Constitucion Mericano.
Gessler a bisa cu discurso tenso den e caso aki a bin parcialmente for di e banda iskierdista. “Nos tin un debate politico fuerte akinan,” el a declara. “Pa bon of malo, e caso aki a bira un punto di enfoke.”
Decenas di caso a ser entrega den henter e pais buscando pa descualifica Trump for di e lista di eleccion 2024 basa riba e clausula di e di diescuatro amendamento cu ta prohibi cualkier hende cu a hura na e constitucion y despues “a participa den rebelion” contra esaki pa participa den eleccionnan presidencial. Nan argumentonan a rondona e envolvimento di Trump den e atake di dia 6 di januari 2021 na e Capital pa stop e certificacion congresional di e eleccion presidencial di 2020.
E caso na Colorado ta e prome entrega pa un grupo cu recursonan legal grandi. E asunto ta espera di yega e Corte Supremo Mericano, cual nunca a dicidi riba e provisionnan di rebelion den seccion tres di e di diescuatro amendamento.
Hues Wallace a dicidi pa discuti dia 30 di october si Trump mester ser kita bao ley di Colorado cu ta prohibi candidatonan cu no ta cumpli cu e cualificacionnan pa e oficina presidencial di participa den e eleccion. El a bisa cu e kier duna e Corte Supremo di Colorado—y posiblemente esun nacional—mas hopi tempo posibel pa evalua e decision prome cu e deadline di 5 di januari 2024.
Un caso paralel na Minnesota entrega pa un otro grupo libera ta plania pa dia 2 di november. E abogadonan di Trump tabata espera pa entrega dos mocion ayera pa rechasa e caso. Un di mocion lo declara cu e proceso legal ta un intento pa tuma vengansa contra e derecho di discurso liber di Trump. Dia 13 di october lo debati e declaracion aki den corte.
Sean Grimsley, ken ta un abogado pa e demandantenan den e caso aki, a propone e orden protectivo den corte ayera. El a cita e fiscal federal Jack Smith siman pasa, cu a pidi pa un orden contra Trump pa menasanan haci den su procesamento di e ex-presidente pa purba cambia e resultadonan di e eleccion na 2020.
