Den un caso di un trahado cu a bringa su retiro pa motibo cu e no a sigui instruccion di dokter di empresa, hues a dicta na su fabor. E caso ta interesante como cu e dokter di empresa a haya cu e trahado no tabata malo mientras tres dia despues SVb si a declara e trahado incapacita pa traha (AO) for di e prome dia di notifica.

E oficina di abogado Faarup Figaroa a trece e caso aki den publicidad algun tempo pasa. Awor nan a bin dilanti atrobe como cu Corte di Prome Instancia a dicta sentencia. Y esaki manera menciona tabata na fabor di e trahado.

E caso ta trata di un empleado cu a notifica malo na tanto su empresa como na SVb. “El a wordo ordena door di su dunado di trabao pa bay keur na e instancia cual e empresa ta uza como dokter di empresa. E dokter di empresa a indica cu na su opinion e trahado no ta malo y a dun’e instruccion pa presenta na pia di trabao e dia ey mes”, asina e oficina di abogado ta splica.

Nos ta compronde cu ta trata di Medwork, cual ta un compania di arbo priva cu ta duna servicionan pa companianan pa entre otro keurmento di trahadonan.

Pa e caso di e trahado: el a dicidi di no sigui e instruccion di Medwork pa bay traha bek pasobra e no tabata sinti su mes bon. El a keda cas y riba e di tres dia el a bay SVb segun reglamento. SVb a declara e trahado AO for di e prome dia cu el a notifica.

“Sinembargo e dunado di trabao mientrastanto a termina e relacion di trabao cu e trahado di forma imediato, como cu esaki no a sigui e instruccion di e dokter di empresa pa bay bek trabao”, asina e abogado ta informa. Pero despues a resulta cu corte ta haya cu e trahado mester haya e beneficio di duda.

“E compania no a establece suficientemente cu e trahado tawata apto pa traha riba e fecha en cuestion. Esaki pasobra ademas di e evaluacion di e dokter di empresa cu e trahado tawata apto pa traha, tin e declaracion di incapacidad pa traha di parti di SVb. Esaki ta trece cu n’e cu no por wordo exigi di e trahado pa e a sigui e instruccion di dokter di compania pa presenta na trabao”, asina e sentencia segun e abogado ta bisa.
“A base di esaki corte e condena e empresa pa tuma e trahado aki bek na trabao dentro di 24 ora y ademas paga tur e salarionan cu el a keda sin ricibi for di e fecha cu el a wordo kita di trabao te na momento cu e wordo permiti pa reanuda esaki.”

Segun e oficina di abogado cu e decision aki, `corte ta duna di conoce cu den caso cu SVb declara e trahado incapacita pa labora (AO), e trahado por basa su mes riba e opinion aki na momento di dicidi si mester presenta na trabao of no’. “Importante ta pa enfatisa cu e trahado tin cu cumpli si cu e proceduranan di e empresa pa cu melding di malesa”.