Hues den e caso civil di un inspector contra centro medico Imsan ta conclui cu ta mustra cu tabatin conflicto di interes y asina e retiro di e inspector no tabata inhusto.
Ta trata den e caso di ex inspector suplente Gregory Edmund Fung-A-Fat cu cuminsa e caso contra su retiro. Imsan a inform’e na januari cu lo no extende su contracto laboral pa motibo di conflicto di interes. Esaki como cu e traha como boticario na Imsan pero tambe e ta inspecteur suplente e na Inspeccion di Remedi. Banda di esaki e tin un compania anto a laga Imsan cumpra material medico for di su negoshi.
Remarcabel ta cu e echo cu e tabata traha como boticario banda di su trabou como inspector, pues cu e mes mester controla su mes, tabata conoci for di 2007 caba. Pasobra ya na 2007 e director suplente di Imsan a pidi Departamento di Salud Publico pa permiso pa por tum’e den servicio. Na november e minister di Salud Publico ( e tempo ey Booshi Wever) a bisa cu nan di acuerdo. Pues asina riba 1 di mei 2008 sr. Fung-A-Fat a drenta den servicio como boticario na Imsan pa 8ora den siman riba un contracto di cada biaha un 1 aña. Na e momento ey e tabata inspector suplente caba (desde 9 maart 2005) asina por lesa den e veredicto.
Dos petchi
Imsan ta uza e echo cu sr. Fung-A-Fat tabatin dos funcion cu ta den conflicto cu otro, como e un argumento pa su retiro sea pa no extende su contracto laboral mas. E situacion aki di ‘dos pechi’ segun Imsan, ta trece e imparcialidad di e Inspector di Remedi den peliger cual no ta deseabel. Pero hues ta remarca cu e situacion aki ya tabata existi 9 aña y nunca esaki aparentemente tabata un problema. “Den un comunidad chikito manera Aruba tin biaha e ta dificil pa haya persona cualifica pa funcionnan specifico. Asina cu funcionnan dobel ( pechi dobel) por mira aki mas compara cu comunidadnan mas grandi manera Hulanda”, segun hues.
E ponencia di Imsan cu nan a descubri e situacion aki pa prome biaha na november 2016, esaki no por a convence hues. Mas tanto nan a reacciona ‘den panico’ despues un articulo a sali den Amigoe riba e asunto di conflicto di interes, segun corte.
Hues tambe ta mustra bon cla cu si Imsan solamente a trece e argumento aki como motibo pa retira sr. Fung-A-Fat, e ora corte lo yega na un otro conclusion. Esta cu e ora si lo haya e retiro inhusto.
Beneficia su mesun negoshi
Sinembargo Imsan tambe a duna un otro motibo pa su retiro. Esta cu sr. Fung-A-Fat como boticario a beneficia tambe como doño di su negoshi. Esaki pa motibo cu el a cumpra material medico cerca su mesun compania pa bende despues como boticario.
Sr. Fung-A-Fat a nenga e ponencia aki, mustrando cu ya na 2004 e accionistanan a retir’e como director di e compania (cual ta den man di su famia). Sinembargo su number a keda aparece den e registro di Camara di Comercio como director pues nunca el a kita esaki. Banda di esaki el a keda accionista y asina tambe tabatin un interes financiero.
Imsan tambe a mustra hues cu te februari 2014 nunca a cumpra algo na e compania (Island RX) di sr. Fung-A-Fat. Pero despues si y e centro medico a bin cu facturanan mustrando cu na 2014, 2015 y 2016 a cumpra nuebe biaha material pa un suma di 167.271,34 florin na e negoshi di sr. Fung-A-Fat. Tambe Imsan a mustra cu tabata sr. Fung-A-Fat kende a duna e opdracht na su colegia pa cumpra e material na su compania. Algo cu dilanti corte sr. Fung-A-Fat no por a nenga.
Hues ta haya e ora cu sr. Fung-A-Fat tabata actua den su interes esta e interes di su otro accionistanan di su compania. Como inspector suplente di remedi, e mester ta consciente di conflicto interes y tambe mester a keda leu di influencia un colega pa cumpra e material a su compania. Hues ta condena e manera aki y ta haya e ora pa su cuenta y riesgo cu a sugeri un situacion desconfiansa entre e y su dunado di trabou. Cual finalmente a conduci na su retiro. Pa motibo di esey e no ta haya e retiro inhusto y asina ta nenga tambe compensacion financiero.
