ORANJESTAD – Den diverso medio di comunicacion durante e ultimo dianan a keda reporta cu algun Venezolano, kende tabata den custodia wardando deportacion, a ser libera bou orden di hues comisario di GEA Aruba. E informacion aki no ta corecto.
Den caso cu un stranhero ta wordo deteni pa warda deportacion, hues comisario tin e tarea pa evalua si e stranhero a ser deteni hustamente, y tambe si e por wordo deporta. Esaki segun un comunicado di Corte Comun di Caribe Hulandes.
Den e caso aki, durante e audiencia cerca hues comisario e Venezolanonan a laga sa cu nan kier a solicita asilo politico. Esey no por wordo haci cerca hues comisario, sino ta Pais Aruba mester haci e. A base di e tratado di refugiado, no por deporta un stranhero tanten no a tuma un decision tocante su peticion di asilo. E reglanan aki riba e tratado, cual gobierno Arubano a adopta, mester wordo cumpli pa hues comisario,igual na tur otro regla di gobierno Arubano.
Hues comisario a dicidi cu detencion cu proposito di deporta e stranheronan ta corecto, tanten cu a haci entrega di peticion di asilo oficial na nos pais. No ta conoci si e stranheronan en cuestion a haci esaki. Si en todo caso ainda nan entrega un peticion, Pais Aruba no ta corecto mas pa detene y prepara pa deporta e personanan aki prome cu a tuma un decision. Esaki ta di acuerdo cu e tratado di refugiado.
Hues comisario pues no a dicidi cu Pais Aruba tabata obliga pa libera e stranheronan, sino unicamente a dicidi cu e stranheronan no por wordo deteni mas cu e intencion di deporta nan, si acaso nan lo entrega un peticion di asilo.
