Despues cu den april Terraza Bar (Oude Molen nobo) a haya un ahuste repentino na su orario, cual a pone cu mester a cera den siman pa 1or y riba diasabra pa 3or, e bar a apela y awe hues a dicidi di restaura e orario normal. Nan ta habri bek riba diasabra te 6or y resto di dianan te 3or.
Representante legal di Terraza Bar, Demis Ellis a conta prensa ayera atardi cu nan a haci uzo di e medida provisional pa suspende e decision mientras ta spera e tratamento di e caso den LAR (conforme articulo 54 di Landsverordening Administratieve Rechtspraak).
Ellis a splica cu Hues a otorga e provision mirando cu e argumentonan cu nan a trece dilanti, esta entre otro cu e compania lo sufri financieramente, tabata satisface e condicionnan pa otorga e provision. “Pero nos tin mas argumentonan cu nos lo bay uza tambe pendiente e tratamento di e caso den LAR. Aworaki esaki ta duna e bar espacio pa keda habri mientras e caso ta den proceso pa yega comision di LAR.”
Doño di e localidad, Oldric Fernandes-Pedra a splica cu si mester cambia e orario aki e localidad no lo por sigui draai. Esaki ta pasobra un gran parti di e negoshi cu tin ta bini riba diasabra, ora cu mayoria di nan cliente ta sali di otro establecimentonan manera Gusto, cual ta cera 3 or. Pues di e manera aki e establecimento lo perde su ‘selling point’. Fernandes-Pedra a splica cu pa e mesun rason aki Molen a stop di habri riba diabierna.
