Tory Lanez a ricibi orden pa keda leu di Megan Thee Stallion despues di un audiencia di acusacion pa su delito di abuso. Hues tambe a duna orden pa Tory entrega tur arma cu e ta posee.
Tory a presenta via telefon pa e audiencia ayera na condado di Los Angeles pa loke mester a ta su acusacion. Pero su abogado, Shawn Holley, a solicita un continuacion, cu a ser otorga, pues e no a duna un declaracion di culpabilidad. Sinembargo, e hues a entrega un orden di proteccion contra Tory, y awo e mester keda sikiera 100 yarda leu di Megan, y no tuma contacto cune.
A pone su fiansa na $190mil, cual e lo paga via un bondsman presente na e audiencia. E audiencia ta yega riba e mesun dia cu Megan a skirbi un opinion editorial pa The New York Times riba pakico e ta papia pa muhenan color scur, bisando cu e no tin miedo di critica y ta adamante bisando ‘protege muhenan color scor’ no mester ta un topico controversial.
Ademas el a referi na e caso di Tory Lanez, bisando “Recientemente mi tabata victima di un acto di violencia na man di un homber. Na un fiesta, a tira mi dos biaha mientras mi tabata cana bay leu di dje. Nos no tabata den un relacion. En berdad, mi tabata den shock cu mi a termina den e situacion ey.”
Manera Bon Dia Aruba a reporta, oficina di Procurador General di LA a acusa Tory cu un cargo di abuso cu un arma di candela semiautomatico, y un cargo di tin un arma di candela no registra den un vehiculo. Tambe ta acusa cu a infringi lesion corporal grave riba Megan.
Si keda condena, e rapper/cantante ta enfrenta hasta 22 aña y 8 luna den prison.
Tory a defende su mes publicamente siman pasa y a bisa cu e merece su dia den corte. E rapper a recorda fanaticonan cu ‘un acusacion no ta un conviccion’.
