Diabierna ultimo a tuma lugar un caso den corte na unda abogado David Kock den nomber di Ducapro ta demanda e radio emisora 100.9-Hits100FM (Q-waves N.V.), pa stop di toca musica den aire cu ta proteha pa e organisacion di proteccion di derechonan di autor Buma/Stemra.

Manera ta conoci desde 1 di januari 2024 cualkier compania of persona cu haci uso comercial di musica tin cu paga pa e derecho pa haci esaki. Esaki ta aplica pa cualkier instancia cu ta haci uso di musica di forma comercial, incluyendo radio, DJ, entre otro, segun organisacion pa licencia di musica den Caribe Hulandes, DUCAPRO a informa ayera.

Cualkier persona of compania cu kier haci uso comercial di musica, local y internacional, mester registra boluntariamente pa adkiri un licencia comercial for di e organisacion DUCAPRO, unda cu lo mester paga un suma segun e tamaño y alcance di e compania.

Den caso cu no cumpli cu e licencia aki, esaki por tin consecuencianan legal. E companianan cu ta cay aden ta cualkier cu ta usa musica di manera comercial, por ehemplo radio, DJ, pero tambe cafe, restaurant y gym.

Despues cu e noticia cu for di dia 1 di januari 2024 cualkier compania of persona cu haci uso comercial di musica ta bay tin cu paga pa e derecho pa haci esaki, directornan di algun radiostation na Aruba a reuni cu minister di Telecomunicacion Geoffrey Wever pa presenta nan obhecion pa e decision aki.

E grupo di directornan di radiostation a splica na Minister Wever cu desde e introduccion di Internet, Youtube y tur otro medio musical y social, emisoranan a sufri golpinan duro caba pa loke ta trata cantidad di audiencia y nan entrada. Pa hopi radio emisora, mas gasto di operacion kiermen sla mortal.

Nan a subraya cu na un manera abrupto y cu hasta menasa di tuma pasonan na interes di e instancianan concerni a manda carta pa doñonan di radio. Gerentenan di emisoranan a pidi Minister Wever pa considera e argumentonan presenta durante e reunion pa asina por interveni y yega na un solucion cu ta na bienestar di emisoranan y tur otro instancia cu ta usa musica na Aruba.

“Radio emisoranan ta respeta derechonan di autor y artistanan, sinembargo radionan ta di opinion cu esaki no ta e manera pa impone un gasto nobo pa e emisoranan of otro instancianan,” nan a enfatisa.

Segun e portal di noticia local NoticiaCla a informa, durante e tratamento di e caso den corte, DUCAPRO contra e radio emisora 100.9-Hits100FM (Q-waves N.V) hues indica cu radioemisornan mester paga pa por usa musica di manera comercial, pero falta determina kico ta bira e suma cu ta bay cobra.

DUCAPRO a cuminsa e caso contra e radioemisor en cuestion pa motibo cu e radio no kier paga e suma mensual cu ta rekeri pa e por haya derecho pa toca musica tur luna. E propietario di e radio a sigura cu no ta cu nan no kier paga, sino cu nan tin problema cu e suma/tarifa.

Segun NoticiaCla a indica, durante e tratamento di e caso e abogado cu ta representa DUCAPRO, David Kock, a cuminsa na splica e proceso pakico ta importante pa companianan comercial paga pa e derecho pa nan por usa cancionnan di autornan local y internacional.

El a splica cu DUCAPRO como fundacion ta busca e proteccion di derecho pa tur trabao musical protegi pa derecho di autor (copyright). Den conexion cu esaki, DUCAPRO ta licencia e uso publico y comunicacion di e repertorio di trabao musical protegi pa derecho di autor den Caribe Hulandes, y a traves di su acuerdo cu BUMA-STEMRA, internacionalmente tambe. DUCAPRO ta usa e informacion apropia tocante e trabao musical y su uso pa distribui regalia na su miembronan local y sociedadnan internacional afilia.

E caso aki a lanta pa motibo cu na momento cu DUCAPRO a cuminsa actua y a nota cu entre nan QWaves NV a mustra resistencia.

QWAVES NV

E portal NoticiaCla a indica cu e abogado pa Q-Waves NV, Gabriela Sjiem Fat, a splica cu e problema principal cu nan tin cu DUCAPRO, ta cu nan no ta mira den nan, un instancia cu base legal cu ken nan mester cera un acuerdo pa paga royalties mensualmente. El a indica cu tin mucho duda, y no por prueba cu nan en berdad tin e autoridad local di actua pa cobra emisoranan y si en berdad nan ta representa BUMA/STEMRA legalmente y por actua na nomber di e instancia aki.

Otro punto cu e radioemisor ta contra di dje ta e suma cu ta wordo pidi, cu segun e abogado ta señala, no ta cuadra cu e mercado local y pues ta pidi pa adapta e tarifanan aki pa nan ta mas ‘local’.

Despues di scucha ambos partido, hues a ratifica cu e emisora mester bay paga pa por haya e derecho pa toca musica di autornan local y internacional. Loke mester determina, ta cuanto e suma pa esaki ta bay bira.

Segun e portal NoticiaCla a sigui indica cu e hues e ora a sugeri pa partidonan sinta na mesa pa negosha y yega na un acuerdo, pa cual ambos partido a mustra disponibilidad. Hues e ora a bay over na puntra si mientras cu ta delibera e tarifa, DUCAPRO por cuminsa cobra e emisora un suma mas abou y ki suma e propietario di Q-Waves N.V. ta dispuesto pa paga.

E propietario di e emisora a contesta hues cu nan ta dispuesto pa paga DUCAPRO 250 florin pa luna, cual abogado Kock di DUCAPRO a rechasa indicando cu e suma ta mucho abou, y cu e sumanan ta entre 450 pa 1000 florin bay ariba.

Riba peticion di abogado Kock, hues a determina un periodo di 2 luna pa DUCAPRO y e asociacion ABA yega na un tarifa aceptabel. Hues a dicidi pa wanta e caso y pa bin bek dia 24 di april proximo pa wak si partidonan a logra yega na un acuerdo. Si esaki no ta e caso, e mes lo dicta un sentencia ariba e caso aki.