Ayera pa 2or di atardi a hues a dicta veredicto den e caso contra S. Wilson, chauffeur cu a causa e accidente fatal na Seroe Colorado riba dia 2 di october 2022 cu a kita bida di Joanne y Mirella Wouters, y un criatura di dos aña di edad.
Den luna di april a trata e caso contra Wilson na unda fiscal di Ministerio Publico a duna splicacion amplio di e incidente y basa riba e investigacionnan cu a tuma, a pidi un castigo di 4 aña pa e acusado.
Accident
Un accidente cu a sacudi Aruba completo. Riba diadomingo 2 di october 2022 pa un poco prome cu 11or di mainta na San Nicolas, riba caminda pa Sero Colorado, e accident frontal a tuma luga. Tabata trata di un auto marca Nissan color preto cu a dal den un auto Chevrolet color cora.
S. Wilson, cu a keda transporta cu urgencia pa hospital, tabata core den e auto Nissan color preto y den e Chevrolet cora tabata Mirella, Joanne y Rendrick Wouters, cu lamentablemente a perde nan bida, hunto cu otro pasaheronan, menor di edad cu tambe a keda transporta cu maximo urgencia pa hospital.
Tratamento di e caso
Fiscal di Ministerio Publico a splica cu Wilson a testifica cu e anochi anterior el a asisti na un
festival y a consumi alcohol. Despues di e festival aki, el a yega su cas 4or di marduga y pa
8or di mainta ya caba e tabata lanta ya cu e mester a traha e siguiente dia pa 10or di mainta.
Segun e Fiscal a sigui splica, Wilson tabata na caminda, laat, pa trabou na momento cu el a
ocasiona e accidente cu a costa bida di tres persona di mesun famia. Na yegada di polis, e
acusado a haci e test di blaas pa determina su nivel di alcohol, y esaki a sali positivo indicando cu si e tabata manehando bao influencia di alcohol.
Esaki tabata e punto principal cu e Fiscal a trece pa dilanti y pa cual el a pidi un castigo di cuater aña. Banda di esaki mester agrega na esaki cu e acusado tabata coriendo sin tin un rijbewijs valido e momento ey.
Otro punto importante cu Fiscal a trece pa dilanti ta cu e acusado tabata coriendo na un velocidad
hopi halto, entre 106 y 126 km pa ora na momento cu e accidente a tuma luga, segun investigacion a determina.
Abogado di e acusado, Peter Mohammed, a trece pa dilanti cu su cliente no tabata bao di influencia di alcohol y cu e prome cu e accidente a tuma luga, y cu el a haci test di blaas, el a spula su boca cu listerine y cu ta door di e listerine e test di blaas a sali positivo.
El a remarca despues di algun ora a haci test di sanger pa determina e nivel di alcohol den e sistema y cu esaki a sali negativo.
E abogado a agrega tambe cu prome cu e accidente Wilson mester a desvia y baha caminda pa un otro auto cu tabata bin den su direccion y na momento cu el a subi caminda back, el a dal den e auto di e famia Wouters.
Disculpa di Wilson
Durante e tratamento di e caso e acusado a haya e oportunidad pa bisa algo na e famia di e victimanan y el a expresa na e famia presenta cu e ta hopi sorry pa loke a pasa, a manda palabra di condolencia y forsa pa e famia y a bisa cu e incidente aki ta algo cu lo keda traha riba dje pa resto di su bida.
