Dialuna Hues a tuma decision den sentencia cu director di DIMAS Kathy Paskel a entama contra Minister Glenbert Croes, na unda cu a dicta cu e decision aki tabata uno contra ley.

Hues a suspende e decision di e mandatario te ora cu e caso wordo trata den su profundidad, aunke gobierno no tin mucho chens di gana esaki [un bodemprocedure] mirando cu e decision tabata uno contra ley.

“Mi ta satisfecho cu e contenido di e veredicto,” Sra. Kathy Paskel ta bisa Bon Dia, agregando cu: “Mi awor por sigui desplega mi trabao diario cu tur e autoridadnan cu ta coresponde na e funcion di director.”

Manera conoci, Minister Glenbert Croes a duna retiro na director di DIMAS, Kathy Paskel pa motibo di desconfiansa, y lo mester a bin cu un stuurgroep cu e meta pa guia y informa trahadonan di DIMAS pa loke ta trata maneho nobo di e ministerio aki. Hues a dicta Dialuna cu e decision di e mandatario tabata contra ley y tuma pa motibo di desconfiansa cual ta viola e structura di herarkia di e sistema di DIMAS. Sra. Paskel awor ta haya tur poder back na DIMAS manera e tabata tin anteriormente prome cu decision tuma pa e mandatario algun luna atras.

Gobierno su argumentacion tabata ta cu hues no tin e autoridad pa mete den un decision asina, debi na su contenido, pa cual Hues a contradeci cu su argumento riba e decision di e minister indicando cu ta atacha posicion huridico di e director directamente. Esaki ta duna Hues den e caso aki tur su derecho pa tuma nota y actua.

Otro punto tabata ta cu decision di e minister Croes pa pone Sra. Paskel un banda ta basa riba hecho cu no tin confiansa riba dje mas y Hues ta bisa cu gobierno ta faya den mustra base legal pakico ta tuma e decision aki na prome luga.

Hues a subraya tambe cu a faya den e manera con a trata cu Sra. Paskel por medio di cambia structura, na unda cu solamente pa nomber e lo keda director, pero cu tur otro decision lo mester pasa via un management team. Esaki ta viola regla di herarkia di e funcion conforme ley.

Gobierno a argumenta cu esaki no tabata un caso urgente, pasobra Sra. Paskel ta keda cu su salario completo, cual a resulta di no ta valido. Segun Hues, esaki ta trata hopi mas cu e tema di salario y Sra. Paskel mester por eherce e trabao pa cual e ta wordo apunta na dje pues ta enfatisa cu esaki ta un asunto urgente.