Ayera mainta den Corte di Prome Instancia di Aruba hues a dicta sentencia den e caso di docente di gym E.R.d.M cu tabata sospechoso di a viola un studiante menor di edad. Den su sentencia hues a dicta cu no por a prueba e hechonan castigabel y pues asina a declara e sospechoso liber di tur acusacion.
Dia 10 di januari ultimo a tuma luga e tratamento di e caso di abuso sexual di un menor. Den e caso aki E.R.d.M., ken ta un docente di gym na un scol basico, tabata ser acusa di violacion di un menor bou 12 aña, ken tabata su alumno, durante e periodo escolar 2014 te 2016, ademas di ta den posesion di pornografia infantil.
Den su sentencia hues a indica cu como ta trata un situacion cu ta envolve dos persona so, sin ningun otro victima cu a bin dilanti, Corte mester a primeramente determina si e declaracion di e victima ta consistente, y di dos mester a determina si tin prueba pa respalda e declaracionnan aki.
Pa loke ta e prome dos acusacion, esta violacion y penetracion sexual di un menor bou di 12 aña, hues a dicta cu a pesar cu e declaracion di e victima tabata detaya, esaki no tabata preciso ni tampoco consistente. Hues a splica cu tin algun discrepancia den e declaracion di e victima pa loke ta e edad cu e tabatin ora cu e sospechoso a supuestamente comete e acto castigabel, den e klas cu e tabata y tambe si tabata tuma luga cambiamento di paña y caminda esaki tabata tuma luga.
Loke no tabata cuadra ta cu e victima a indica na prome instante cu e docente a comete e hechonan castigabel ora e tabata den tweede of derde klas ora e ta cambia paña den kleedkamer. Segun declaracion di e sospechoso, cu Corte a indica a ser confirma cu e scol tambe, den e klasnan ey e muchanan no ta cambia paña.
Despues e victima a indica cu e sospechoso lo a comete e acto castigabel ora e tabata den vierde klas na momento cu e ta cambia paña despues di les di gym den kleedkamer. Corte a indica cu basa riba declaracion di e sospechoso, cual tambe a ser confirma pa e scol, prome cu aña 2020 no tabatin dicho kleedkamer cu e victima ta referi na dje.
Pa e motibonan aki, entre otro, corte a constata cu e declaracion di e victima no ta preciso ni consistente. Mirando cu e prome pregunta, si e declaracion ta cosistente, no por a ser contesta, no a ni pasa na e di dos pregunta cu ta encera si tin suficiente prueba pa respalda dicho declaracion.
E sospechoso E.R.d.M. tabata ser acusa tambe di posesion di pornografia infantil. E acusacion aki a bin despues cu Ministerio Publico (OM) den su investigacion a confisca un computer di e sospechoso den cual a haya un cantidad di potret cu tabata mustra hobennan sin T-shirt entre otro, algun cu tabata mustra parti intimo y videonan cu contenido posiblemente sexual.
Hues a splica cu en total nan tabata 17 potret y dos video cu contenido posiblemente sexual. Despues di a mira e potret y videonan aki, corte ta constata cu mayoria di e potretnan aki ta selfies caminda ta mira e hobennan sin T-shirt, pero di nan torso bay ariba, pues no ta considera cu esaki ta contenido sexual.
Den e caso di videonan caminda por mira e parti intimo di e persona, hues a indica cu como no tin e fecha specifico cu e video a ser graba, no por determina si e persona cu ta aparece den e video ta un menor di menos di 18 aña. Pa e motibo aki hues a declara e sospchoso liber di e acusacion di posesion di pornografia infantil tambe.
E sentencia aki a cay como un shock y sorpresa grandi pa e mayornan y famia di e victima, ken ta na Hulanda bou di tratamento psicologico pa motibo di e trauma cu el a desaroya.
Durante e tratamento di e caso mama di e victima a dirigi su mes na hues y cu lagrima na wowo y un voz cu por a scucha su dolor y tristesa, el a elabora riba e trauma cu e actonan cu e sospechoso a comete a trece pa no solamente su yiu, e victima, pero si no tambe pa henter e famia.
El a indica cu pa motibo di e trauma pisa aki su yiu a purba di comete suicidio no un, ni dos, ni tres, pero cuater biaha.
E mama di e victima a sigui conta cu su yiu, ken tabata un mucha homber cu tabata miho studiante di su klas, un mucha homber trankil y alegre a cambia bira un mucha cu ta biba solamente den angustia y un tristesa interminabel.
Pa motibo di e trauma enorme cu el a pasa e victima ta den tratamento psicologico y ta evaluando e posibilidad pa intern’e den un facilidad psicologico pa asina por brind’e e miho ayudo posibel.
El a expresa cu como mama e ta un dolor increibel pa mira con su yiu ta lucha diariamente cu su e retonan cu e trauma inimaginabel aki ta trece cune.
Despues cu e sentencia di hues den e caso aki a bira conoci publicamente, riba rednan social comunidad a reacciona y a expresa nan disgusto.
Hopi ta cuestiona con por ta posibel cu e sistema hudicial na Aruba ta declara un persona liber di tipo di acusacionnan serio manera ta violacion di un menor sin balora e voz di e mucha, e victima.
E grupo contra abuso di mucha “Ta Basta” a publica e noticia riba nan pagina di Facebook y a ricibi un cantidad di reaccion. Mayoria comentario ta ratifica e disgusto y indignacion di pueblo cu e sentencia cu hues a dicta.
Hopi ta cuestiona cuanto mucha mas mester sufri, cuanto mucha mas mester pasa den un experiencia traumatico manera bira victima di violacion, cuanto mucha mas mester biba e resto di nan bida cu un trauma y no ricibi e husticia cu nan merece prome cu gobierno y instancianan concerni tuma accion y trece un cambio den e sistema hudicial pa tipo di actonan asina no bay sin un castigo.
