Ayera mainta hues a indica cu e ta aproba mayoria di e testigonan riba e lista di Sr. Otmar Oduber pa wordo scucha den e caso Caso Flamingo. E lista di testigonan aki ta inclui parlamentario y lider di fraccion MAS den Parlamento, Marisol Lopez-Tromp.
Saliendo for di corte abogado di Oduber, Vito Carlo, a expresa cu e ta sorprendi, contento y satisfecho cu e decision di hues pa aproba mayoria di e testigonan cu e y su cliente a presenta pa declara den e caso Flamingo.
“Mi ta convenci cu e hues a studia e dossier di comienso te final pasobra e testigonan cu el a bay di acuerdo cune ta mustra cu e dudanan cu nos a trece dilanti den e investigacion, mester wordo investiga. Segun mi nos a pidi 35 of ta 36 testigo pa testigua, y hues a duna OK pa 30 y hues mes a pidi un testigo extra cu nos no tabatin den nos lista,” e abogado a indica.
Sr. Carlo a remarca cu a pesar cu nan no a keda cla cu full e dossier, e ta convenci cu e preparacion cu su mes hunto cu su cliente a haci a saca su fruto y asina hues a wak e importancia pa scucha e testigonan, no solamente pa “mustra e inocencia di Otmar”, pero tambe pa nan demostra cu e proceso aki for di prome dia no tabata corecto.
“Tabatin hopi fout cu a wordo haci y e pregunta ta si e foutnan a wordo haci a proposito of no, pero e hues aki ta mustra, door di aproba 30 di nos 35 of 36 testigonan mas un, cu e ta wak cu algo no ta klop y Otmar tin e derecho di defende su mes,” el a resalta.
El a splica cu hues a pone ‘voor onbepaalde tijd’, pa duna e hues comisario espacio pa realisa su investigacion. El a agrega tambe cu si caba cu e 31 testigonan aki y nan wak e necesidad pa scucha mas testigo, hues a bisa bisa cu por haci e peticion na hues comisario y si ta necesario hues por acerca corte pa wak si tin necesidad pa scucha mas testigo.
“Mi ta kere cu esaki, den tur e slanan, esaki ta un victoria. No ta e victoria final, pasobra awo e trabao a cuminsa y e caso aki no ta bay wordo bringa den corte, pero e ta wordo bringa durante interogacion di e testigonan pa nan mustra cu Ministerio Publico y e tema di investigacion ta full robes,” el a señala.
Di su banda, Oduber a resalta cu e ta contento cu e decision di hues pasobra “loke ta tumando luga cu nos Ministerio Publico no ta bon, no ta corecto y no ta imparcial.”
El a indica cu dialuna Ministerio Publico no kier a laga scucha ningun hende y a nenga tur e testigonan riba e lista, pero finalmente hues a aproba 30, mas un cu e hues mes a pidi pa scucha un testigo den e caso aki, di e 35 of 36 testigonan cu el a presenta
E testigo cu hues mes a indica cu e kier scucha ta parlamentario y lider di Fraccion MAS, Sra. Marisol Lopez-Tromp.
