E huelga di 730 piloto di Avianca, cu ta mantene mita di su operacion paralisa, ta parce leu di un solucion y hasta por intensifica.
E convocatorio di parti di Ministerio di Trabao, di un tribunal di arbitrahe pa trata e conflicto cu ya a completa 12 dia y tin como 230.000 pasahero sin posibilidad di yega na nan destino, na lugar cu e partidonan den conflicto yega mas cerca, a parce di aleha nan ainda mas, mientras cu e Asociacion Colombiano di Aviador Civil (Acdac) a rechasa e medida arbitral.
Tension ta subiendo, tambe pa un problema di añas atras, pero cu den e conflicto actual a converti den e bataya mas duro entre e compania y e sindicalistanan, pasobra “nos tin 24 aña sin enfrenta un huelga di e naturaleza aki,” voceronan di Avianca ta indica.
Esey a bira evidente den e negociacion, den cual, apesar cu e relacionnan entre e representantenan di Acdac y directiva di Avianca ta cordial, e rechaso di e propuestanan di ambos banda ta retrasa yegada na un acuerdo.
Acdac a pone riba mesa un lista di exigencia di 30 pagina, cu 218 clausula, algun di nan considera pa Avianca como fuera di limite, sin relacion cu e bienestar laboral di e tripulacion, cu cual ta garantisa seguridad di vuelo. Esey ta e caso di e exigencia cu e compania mester paga Direccion di Impuesto y Aduana nacional (DIAN) 70% di e obligacionnan mensual tributario di e total di salario.
Como reaccion, e doño mayoritario di e compania, German Efromovich a emiti declaracion cu a yuda complica e relacion cu e lider sindical di e pilotonan, capitan Jaime Hernandez, cu tabatin problema caba cu Efromovich.
Segun presidente di Avianca, Hernán Rincón, cu e aña aki so caba a un lista grandi peticion, denuncia y caso den corte.
Cu e animonan cayente, e compania a dicidi di pidi declara e huelga ilegal, pasobra no lo a yame pa unanimidad. Despues ministerio di Trabao a cay aden como mediador, pero no a convoca di biaha un tribunal di arbitrahe, cu varios gremio di e sector, manera ATAC (Asociacion di Transporte Aereo) tabata reclama. Despues a bin e decision pa pasa pa un tribunal di arbitrahe, cu tabata mustra e tabla di salbacion den e conflicto, cu eleccion di un arbitro pa cada un di e partidonan den conflicto, y conhuntamante eleccion di e tercer arbitro. E tribunal lo mester duna un veredicto dentro di 20 dia, mientras cu lo a reanuda trabao.
Pero diabierna ultimo, Acdac a sorprende cu e anuncio cu nan ta rechasa e medida arbitral.
Cu esey, e pilotonan, atraves di capitan Hernández, a anuncia cu nan lo continua ‘na tera’ y cu nan no ta designa arbitro pa e tribunal, considerando e tribunal ilegal: “pasobra gobierno no a warda e 60 dianan previsto como tempo maximo pa duracion di e huelga.” Ta habri asina otro siman sin solucion na e conflicto.
