Huelga di maestro di enseñansa publico na Peru ta un lucha serio entre e grupo di maestro y gobierno di Peru, pa motibo cu e situacion aki ta afecta 3,5 miyon studiante, pa mas di dos luna caba. Gobierno ta acusa dirigente di e grupo di protesta di maestro di tin vinculo cu ex-gueriya Sendero Luminoso.
“Mi ta di acuerdo cu nan lucha husto pa haya condicion miho, pero aki nos ta papia di
un grupo chikito di dirigente cu tin un vinculo documenta y poco cla cu e grupo di Sendero
Luminoso,” Carlos Basombrío, ministro di interior di Peru a splica. “Esaki ta haci cu maestronan ta bira terorista? Naturalmente cu no,” e ministro a clarifica. E declaracion di e ministro a pone mas salo riba e herida entre henter e grupo di maestro cu ta den huelga, pasobra nan a nenga e acusacionnan aki. “Ta rechasa tur denuncia,” Pedro Castillo Terrones a splica.
Terrones ta un di e lidernan principal di e huelga aki, y el a nenga algun vinculo cu e grupo Movadef. Mas di 70% di scol di educacion publico di e pais aki ta paralisa, segun ministerio di educacion. Mas di 3.5 miyon di mucha di 19 region di Peru ta afecta pa e huelga aki, cu a cuminsa dia 15 di juni, cu apoyo di varios sindicato di trahado den sector
di educacion di Peru (Sutep).
