Hubert Dirksz di FTA tocante reunion cu mediador y trahadonan di Citgo: ‘Nos kier sinta na mesa, pero no por descarta cu accion por intensifica’

Ayera mainta trahadonan di Citgo y representantenan di sindicato FTA a tuma accion pa via di e situacion cu nan ta atravesa na e momentonan aki den nan trabou pero tambe nan a reuni hunto cu mediador di Gobierno pa intermedia den e problema aki.

Hubert Dirksz di sindicato di FTA a splica cu durante e reunion cu mediador di gerencia di Citgo, nan a haya mas claridad. Nan ta considera cu Citgo tabatin mas informacion pa nan y di parti di mediador a bin un proposicion pa busca un solucion y haci intento di sinta cu gerencia di Refineria di Aruba (RDA) y Gobierno na mesa, pa asina wak con ta bay lo mas leu posibel.

El a informa cu ayera nan por a sinta cu RDA y Gobierno, sino cu a propone e reunion pa awe atardi 3or. E reunion cu mediador y Citgo, nan por bisa cu nan tin un situacion caminda cu Citgo ta na un punto pa termina su operacion na Aruba y move bay.

Den esaki ta existi dos situacion, Dirksz a señala. Un cu tin un operacion cu tin cu continua, tin trahadonan den un situacion cu a rechasa e oferta minimo pa termina e relacion di trabou y tambe tin den e caso aki un continuacion di trabou cu mester tuma luga pa move e cargo pa un operador nobo.

Tambe el a bisa cu nan no ta conoce e operador nobo y compania ta bisa cu situacion financiero ta dificil, pero pa e motibo ey, nan ta keda riba nan punto desde comienso pa bisa cu “si nan por sa cuanto hende mester keda y cuanto mester bay, automaticamente e placa cu por tin pa paga pa esunnan cu ta bay por ta mas hopi y nos por yega na un acuerdo mas facil”, Dirksz a expresa.

El a señala cu nan ta pendiente di kico lo pasa di parti di Gobierno, tambe caminda cu e por contribui no solamente pa tin claridad pa continuacion di trabou, pero tambe ariba e fondonan cu mester pa paga e trahadonan y asina nan por keda satisfecho.

Di tur combersacion cu nan tabatin ayera hunto cu mediador, Dirksz a comenta cu nan a por conclui cu esey por tuma luga pa hopi tempo caba. Y na cierto momento ora cu gerencia di Citgo ta bisa cu memey di aña e tabatin un suma mas aceptabel pa por a cumpli cu tur e peticion di trahadonan segun ley, cu segun a wordo duna na e otro grupo cu a bay, awe nan por ta den un situacion hopi mas faborabel.

Asina mes, el a laga sa cu IOWA tambe tabatin un reunion cu gerencia di Citgo, RDA y Gobierno pa loke nan ta espera di ta riba e mesun linea, mirando cu tres grupo ta den mesun situacion.

Pa finalisa, el a duna di conoce cu nan lo sigui cu ‘slow down action’. Nan ta evaluando y wardando e contestanan manera cu nan ta desea pa sinta na mesa y keda cla, pero nan no por descarta cu e accionnan por intensifica.