Conferencia di 35 aña di Status Aparte ‘Aruba Ta Di Nos Tur’ a tuma lugar ayera mainta

Cu presencia di su excelencia Gobernador, Alfonso Boekhoudt, minister, politico y parlamentarionan di diferente partido hunto cu algun personalidad conoci di e isla, ayera diamars mainta a tuma lugar e conferencia 35 aña di Status Aparte “Aruba ta di nos tur” na ballroom di hotel Marriot.

Ruben Garcia tabata e persona encarga di presenta e conferencia aki na unda cu primeramente el a trece dilanti loke a sucede 35 aña pasa caminda cu 1 di januari di aña 1986 e pais Aruba haya su status aparte na momento cu Betico Croes y prome minister Ruud Lubbers di Hulanda hunto cu Don Martina y na e tempo ey minister presidente di Antia Hulandes, a firma na 1983 pa Aruba por haya su status aparte, awe esey ta un realidad.

Despues di e palabranan aki, a dedica un minuut di silencio na e fayecido ex-minister di Husticia Rudy Croes ken a bay sosega diasabra ultimo dia 20 di november debi na malesa di cancer pa e cual e tabatin añanan luchando contra dje.

Danki na e union di henter pueblo Arubano cu status aparte aki pais Aruba a haya su institutonan y instrumentonan economico den su propio man pa asina por desaroya e pais.

Desde añanan 30 di siglo pasa ya caba Aruba tabatin su deseo pa separa for di e isla mas grandi cu ta Corsou, na 1933 tabata prome bes cu e deseo pa libertad a keda vocifera mediante un peticion di Raad van Politie di Aruba y a dirigi na Reina Wilhemina.

18 di maart 1948, 2147 ciudadano ta firma un peticion y ta entrega esaki na su mahestad Reina Juliana na Hulanda door di e politico Shon A. Eman, e peticion tabata pa Aruba haya autonomia, seis aña despues na 1954 Reina Juliana a firma e statuut unda cu Antia a haya mas autonomia.

Asina otro yiunan di tera a sigui traha duro pa progreso di Aruba, decada 70 a habri cu destino di Aruba tabata bao di menasa, gritonan di Independencia di Surinam y Antias tabata resona na Den Haag cu e voz di Betico Croes cu a haya retonan den Reino Hulandes.

Aña 1977 tabata decisivo pa status aparte unda cu den un referendum consultativo dia 25 di maart di e aña ey un mayoria di e pueblo a vota na fabor di independencia y na augustus di 1977 e lucha por medio di protesta y manifestacion a yega na su punto mas critico.

Augustus Scur a hiba Aruba na un september di claridad unda un delegacion nacional lidera pa Betico Croes hunto cu demas politico, sindicatonan y gremionan di Aruba a biaha y esey tabata e inicio di e preparacion unda cu na maart di 1983 e prome minister di Hulanda Lubbers ta formalisa Aruba su status aparte.

1 di januari di 1986 tabata e nacemento di pais Aruba unda cu a keda marca pa ceramento di refineria Lago y eynan un etapa nobo a cuminsa cu turismo como protagonista economico di mas grandi na unda cu a trece hopi desaroyo pa Aruba creciendo den populacion y infrastructura asina como tambe a confronta hopi dificultad y retonan.

Den e conferencia ki tambe a presenta diferente panelista como economista Rendell de Kort, Hubert Dirks kende ta comerciante y Edric Croes kende a studia Historia na Universidad di Rotterdam y ta trahando mas cu dies aña na Archivo Nacional di Aruba; unda nan a combersa riba e posicion di Aruba de Reino.

Tocante esaki, Dirks a comenta cu el a haya jammer cu cierto politiconan no tabata presente den conferencia aki, el a referi na esun cu ta pertenece na partido AVP specialmente su lider Mike Eman cu no a asisti na e conferencia aki.

Igualmente, el a duna su opinion tocante oportunidadnan pa Aruba su economia por recupera. El a menciona cu Aruba tin un pilar economico ‘tremendo’ pero esaki mester un maneho bon. “Si nos ta cuminsa consolida en bes di diversifica, den pandemia ora cu nos tur a haya miedo, bo ta bisa cu e pais aki cu tur cos cu el a build up, ta un fout cu nan no a consolida, kiermen, pone bon fundeshi pa bo business model cu ta turismo”, el a indica.

Pa Rendell de Kort su pensamento ta cu aworaki Aruba ta bibando miho cu 35 aña pasa y e isla a surpasa diferente retonan y cu aworaki mester para riba kico mester reenforsa pa por haya fondonan, mester enfoca riba e parti con Aruba ta yuda su hendenan pa ta mas activo door di crea educacion por ehemplo, unda e hende por experimenta.

Pa finalisa, varios personalidad di Aruba a duna su comentario tocante e vision cu nan tin pa Aruba na unda cu algun di nan a sigui enfoca riba turismo y a duna varios tip asina mehora e industria aki, tambe mehora e diferente atraccion cu Aruba ta ofrece na su turistanan como mehora e facilidadnan y haci’e mas accesibel.

Tambe pa desaroya e capital humano pa asina crea un nivel di bida hopi mas halto, diferente ideanan a bin dilanti den conferencia aki pa conmemora e 35 aña di Status Aparte cu a culmina cu exito y cu e palabranan di prome minister Evelyn Wever-Croes.