Gigante di tecnologia Chines, Huawei ayera a reporta un aumento di dos digito den benta, a pesar di sancionnan Mericano cu ta menasa di interumpi su negoshi di smartphone y ekipo di red.
Huawei Technologies Ltd. a bisa cu benta a aumenta 24.4% den prome nuebe luna di 2019 na 610.8 biyon yuan ($86 biyon). Esey tabata mas lihe cu e 23.2% reporta pa prome mita.
E anuncio a yega despues di negociacion comercial entre Merca y China na Washington, cual a termina diabierna sin palabra di progreso pa resolve status di Huawei.
Administracion di Trump, cu ta acusa Huawei di ta un riesgo di siguridad, a impone limitenan na mei riba su acceso na tecnologia Mericano y componentenan incluyendo Google music, maps, y otro servicionan di smartphone.
Washington a retrasa cumplimento y a sugeri cu lo por permiti benta di algun tecnologia Mericano. Pero presidente di Huawei, Liang Hua, a adverti na juli cu lo ‘enfrenta dificultad’ den segundo mita.
Huawei a bisa cu ta eliminando componentenan Mericano for di su ekipo di smartphone y red, y a anuncia su propio sistema di operacion pa celular pa reemplasa Android di Google si ta necesario.
Pero ningun proveedo no- Mericano por reemplasa Google music, map y otro servicio completamente. Analistanan di industria ta bisa cu esaki por menasa status di Huawei como e marca #2 global di smartphone, tras di Samsung pa volumen di benta.
Huawei a bisa cu entrega di smartphone a aumenta 26% den e prome luna di 2019 compara cu aña anterior, na 185 miyon unidad.
Advertencianan di Merca tocante siguridad ta enfoca riba status di Huawei como proveedo mas grandi di ekipo di red cu ta forma e curason di rednan di telecomunicacion. Huawei ta nenga acusacion cu ta facilita spionahe Chines, of cu por instala ‘porta patras’ den su ekipo pa spionahe.
Washington ta purbando di convence aliadonan pa prohibi Huawei for di plannan pa rednan 5G. Alemania, Francia y Irlanda a bisa cu nan no tin plan pa prohibi ningun proveedor.
Diamars un oficial Mericano a adverti cu Washington lo reconsidera comparti inteligencia cu aliadonan cu ta uza ekipo di Huawei.
