Huawei a lansa un campaña promocional na Reino Uni mientras oficialnan ta reconsidera e rol di e compania di tecnologia Chines den suministro di ekipo pa e rednan mobil di velocidad halto di proximo generacion di e pais.
E compania a saca aviso di pagina completo den corant nacional Britanico delineando su compromiso pa provee companianan mobil y di broadband cu ekipo pa rednan di cinco generacion, maske ‘awo algun ta cuestiona nos rol den yuda Reino Uni lidera e caminda den 5G’.
Huawei ta aumentando su esfuersonan pa gana over opinion publico mientras ta enfrenta presion aumentando di un campaña Mericano cu meta pa persuadi su aliadonan pa descarta su ekipo di telecomunicacion pa motibo di miedo cu Beijing lo por us’e pa spiona of sabotahe – un acusacion cu e compania consistentemente a rechasa.
Huawei a ricibi un rol limita na januari pa construi e rednan nobo di velocidad halto 5G na Reino Uni. Sinembargo, siman pasa e Centro Nacional di Siguridad Cibernetico Britanico a cuminsa un revision pa examina e impacto cu sancionnan Mericano nobo contra Huawei lo por tin riba e rednan di e compania, oficialnan a bisa.
Restriccionnan Mericano riba fabricantenan di semiconductor stranhero revela luna pasa tin como meta pa limita habilidad di Huawei pa usa tecnologia Mericano, escalando un bataya geopolitico entre Washington y Beijing tocante desaroyo y siguridad di e industria.
E sancionnan ‘definitivamente lo daña e cadena di suministro global di industria di semiconductor, riba cual hopi industria ta depende’, maske ta mucho trempan pa saca un conclusion tocante e impacto, vice-presidente di Huawei, Victor Chang a bisa reporteronan den un conferencia via telefon.
Huawei a enfrenta un obstaculo siman pasa na Canada, unda dos di e tres compania di telecomunicacion mayor a dicidi di no usa su ekipo pa nan rednan 5G.
