Desde mei, migrantenan Venezolano deteni den e facilidad di detencion administra pa Guarda Nos Costa a participa den cuatro protesta exigiendo pa wordo repatria na Venezuela, segun organisacion pa derechonan humano, Human Rights Watch.

Pa compronde pakico un persona, memey di pandemia di Covid-19 lo kier bay back na un pais cu un sistema di salud den collapse, y cu no ta ricibiendo ciudadanonan cu bolbe, mester ta familiar cu e facilidad di detencion di GNC.

Informacion for di e facilidad ta limita, mientras recientemente a nenga acceso na gruponan humanitario. Pero organisacionnan pa derechonan humano y medionan di comunicacion a reporta mal condicion, incluyendo congestionamento/sobrepoblacion, violencia na man di e guardianan, y falta di productonan basico di higiena. Un migrante deteni a bisa cu nan no ta ricibi ni bishita ni nutricion adecua, y solamente sporadicamente ta permiti pa papia riba telefon pa algun minuut cu nan famia na Venezuela.

Autoridadnan no a permiti trafico aereo ni maritimo entre Aruba y Venezuela for di februari 2019, efectivamente parando e proceso di deportacion. Pero, den violacion di ley internacional, e migrantenan Venezolano ta keda den detencion, segun HRW. Algun ta deteni pa mas di seis luna.

Aruba lo mester laga migrantenan, kende no por wordo deporta na nan pais di origen inminentemente, den libertad. Liberacion no solamente ta den linea cu ley internacional di derechonan humano, sino tambe ta un stap importante pa maneha e aumento den riesgo di contrae e novel coronavirus cu hende den detencion ta enfrenta, mirando sobrepoblacion y condicionnan no higienico. Te cu ayera, Aruba a registra 2006 caso total di coronavirus, y 10 morto. Autoridadnan no a bisa si tin caso confirma di infeccion of morto pa Covid-19 den e facilidadnan di detencion di GNC.

Organisacion Mundial di Salud (WHO) ta bisa cu ‘hende priva di nan libertad… probablemente ta mas vulnerabel na malesa di coronavirus (Covid-19) cu e poblacion general, pa motibo di e condicionnan di cera den cual nan ta biba hunto pa periodonan prolonga’. Subcomite di Nacionnan Uni riba prevencion di tortura a urgi gobiernonan pa ‘revisa e uso di detencion di inmigracion y cera camponan di refugiado cu mira pa reduci nan poblacion na e nivel mas abao posibel’ den respuesta na pandemia di Covid-19.

Segun Human Rights Watch, Aruba mester actua awo pa resolve e crisis den facilidadnan di detencion di migrante y preveni un brote di Covid-19 cu lo afecta esnan paden y pafo di e centronan.