Hotelnan na Boneiro ta sufri dañonan financiero grandi. Esaki ta mirando cu WEB tin problema cu e servicio rehabilitacion di awa di pos cu nan tin mester pa muha e hardinnan. Esaki ta obliga hotelnan uza awa di bebe pa muha mata, cual no solamente ta 15 biaha mas caro, pero tambe ta afecta nan imagen como un destinacion sostenibel.
Un grupo di hotel a acerca gobierno local pa discuti e efecto di e prijsnan aki, pero gobierno no a reacciona riba esaki. Awo na luga di e 600 dollar cu e awa rehabilita lo costa, e hotelnan ta paga un averahe di 10 mil dollar. Anualmente, esaki ta bin na un suma di alrededor di 120 mil dollar na perdida.
Solucion
Un solucion posibel ta pa e hotelnan rehabilita nan mesun awa. Un di e hotelnan a bay over na inverti 130 mil dollar na un planta cu lo haci esaki riba nan mes. Pero no por a logra cuminsa opera esaki mirando cu ley tin’e prohibi pa hotelnan recicla awa riba nan mes. E directiva di e hotel a hiba e caso cerca ministerio di infrastructura y Tweede Kamercommisie voor Koninkrijk relaties.
Segun fuentenan, e causa di e problema ta cu e pa añanan largo tin un discusion cu e contratistanan di WEB cu ta nenga di caba e proyecto sin extra pago. E fase final ta un sistema di tubo cu lo hiba e awa recycle directamente na e hotelnan. No tin claridad riba ki dia esaki por wordo resolvi.
Mas problema
Mientrastanto tin mas problema na caminda, na cierto luganan e afvalwatersysteem ta den yega su capacidad completo. Mas sinembargo, placa pa amplia esaki y instala mas pompstation no tin.
Pa e motibo aki, hotelnan a pidi ontheffing pa e prohibicion di recicla nan mesun awa, pero no ta hayando reaccion riba esaki. E planta pa recicla awa di pos a costa Boneiro 35 miyon euro, cual 20 miyon a wordo subsidia pa comision Europeo. E resto Boneiro tin cu paga bek. Na e subsidio aki a bin dos condicion e tuberia cu ta pasa awa recicla na hotelnan y e ingreso di un afvalwaterheffing local. Ningun di e dos nan aki a pasa ainda.
