Durante e ultimo dianan aki Bon Dia Aruba a haya informacion di diferente fuente cu hotelnan lo ta ricibiendo cobransa di impuesto pa aña 2018 estilo pre-pago. Lo ta trata di e asina yama Tourist Levy, cu ta un impuesto di 9.5 porciento cual ta bay directamente pa e fondonan di Aruba Tourism Authority (ATA). Esaki lo ta encera cu hotelnan lo mester paga un suma adelanta di loke ta calcula cu nan impuesto lo ta y esaki lo wordo desconta na final di aña.
E cobransa aki lo ta biniendo via un compania local cu ta specialisa den impuesto. Nos redaccion a tuma contacto cu AHATA pa asina haya mas informacion pero a wordo notifica cu e CEO no tey actualmente pa cual lo mester tuma contacto cu ne bek otro siman. Tambe a purba na diferente ocasion pa haya contacto cu minister Dangui Oduber (MEP) kende ta encarga cu turismo pero e mandatario te ainda no a duna oido na yamadanan di Bon Dia Aruba.
Durante dia di awe nos redaccion lo ta tumando contacto cu diferente hotel, cu e compania cu posiblemente ta encarga pa haci e cobransa di e impuesto y lo purba un biaha mas cu e mandatario concerni.
