Personanan preocupa cu e revolucion robotico ta menasa nan trabou por cuminsa relax. Henn na Hotel na Hapon tabata orguyoso di su staf completamente robotico, pero a bin resulta cu nan no por a maneha e trabou.
E staf robotico di Henn na a wordo adkiri na 2015 cu e meta di converti den ‘e hotel mas eficiente di mundo’. Pero cuater aña despues, ta parce cu e 243 robot ta menos un novedad y mas un molester. Como resultado di esaki, e Henn na Hotel a retira mita di nan, segun un relato di The Wall Street Journal.
Un huesped a keha cu e assistent virtual Churi, poni den cada camber di e hotel, a keda lant’e for di soño puntrando, “Sorry, mi no a compronde esey. Bo por ripiti bo pregunta?” pasobra e huesped tabata ronca. Otro huespednan a keha riba TripAdvisor cu Churi tabata interumpi nan combersacionnan. Eventualmente, tur robot Churi a wordo kita for di e cambernan.
Pero Churi no tabata e unico robot cu a perde su trabou. Robot concierge humanoide, y robot di check-in animatronico di dinosaurio, cu no por a contesta preguntanan basico di e huespednan sin ayudo humano a wordo retira. Tambe a retira bailarinnan kibra for di e lobby.
Robot Bellhop a wordo diseña pa hiba maleta, pero nan por a move unicamente riba superficie plat, y tabatin acceso unicamente na un cantidad chikito di camber. Nan carera den hoteleria tambe a caba trempan. “Nan tabata hopi slow y ruidoso, y lo keda pega purbando di pasa band’i otro” Taishi Mito, un huesped den pasado, a bisa e Wall Street Journal.
E retiro di casi mita di e robotnan di e hotel por parce duro, pero na final di dia, un hotel mester enfoca riba e comodidad di e huespednan mas cu e ‘gimmick’ di tin robot como empleado. “Ora bo cuminsa uza robot di berdad, bo ta ripara cu tin luganan cu no tin mester di nan – of simplemente ta cansa hende”, Sawada a bisa Wall Street Journal.
