Den un carta fecha 19 di maart 2019, Banco Central a manda un carta di advertencia pa e banconan comercial na Aruba, den cual nan ta trece dilanti nan preocupacion pa e compania Three Rivers Real Estate NV, presenta pa gobierno di Aruba como e compania encarga cu construccion di e hotel a;;-inclusive di 900 camber na Sero Colorado.
Banco Central ta expresa su preocupacion, reaccionando riba noticia den medionan local tocante e compania aki, su director, accionista y/o ‘ultimate beneficial owner’ (e persona scondi tras di e construccion legal aki). E preocupacion ta concerni posible riesgo eleva pa labamento di placa.
Dia 15 di maart 2019, Bon Dia Aruba a publica dos articulo simultaneamente tocante e compania aki. Uno tabata trata un di e personanan nombra como director di Three Rivers Real Estate, Jorge Luis Colmenter Guzman, señala den hopi publicacion como perteneciente na e ‘inner circles’ di Chavismo. E otro articulo tabata trata e compania Connected Capital, cu supuestamente lo a bay hunga un papel den financiamento di e proyecto na Sero Colorado. For di investigacion den registro publico mercantil di Londres, Inglatera, a bin resulta cu esaki no ta un fondo di inversion, sino un compania chikito sin ‘assets’ di algun tamaño. Te na 2017 e mesun Jose Luis Colmenter Guzman tabata involucra cu e compania aki, cu en realidad ta un ‘Limited Liability Partnership’.
E carta di Banco Central ta indica en todo caso cu a reacciona diligentemente riba e noticia di Bon Dia Aruba.
