Asina a informa Vasco Baselli ken ta e general manager di e hotel aki algun dianan pasa den un entrevista cu Noticia Impacto unda el a afirma cu nan a firma un CAO pa e proximo cuater aña despues di un productivo negociacion entre ambos partido.

Tambe, el a splica cu nan a haci un acuerdo den cual nan ta sinti cu ta faborece ambos banda den cual nan ta compromete nan mes pa cuater aña mas.

Esaki ta e dies contract cu nan ta firma despues cu nan a firma esun prome 31 aña pasa cu e mesun sindicato Federacion di Trahadonan di Aruba, asina mes, el a expresa cu e contract existente tabata solido caba “pero obviamente ora bo tin un historia di hopi contract colectivo cu procesonan di negociacion ta bay desaroyando confiansa riba un base cu a wordo construi, mi ta kere nos a haci’e y esey tabata e clave e biaha aki pa di un manera agil por ahusta y modernisa tanto e formato como tambe algun di e beneficionan”, el a bisa.

Pa nan ta un orguyo grandi manera Baselli a indica, di representa e compania y e ta kere cu un contract colectivo hopi bon estableci y elabora, por tin e basenan pa un compania exitoso cu e cual tin cu atende y sigui crece den e industria.

Hose Figaroa presidente di FTA a bisa cu nan tabata hopi orguyoso cu e resultado di e resultado, algo cu a bay hopi lihe pero eficiente, segun el a sigura, nan a toca diferente puntonan di un forma directo. “Hopi biaha e duracion di e negociacion tin di haber cu e postura di e partidonan, y den e caso aki bo ta wak cu ambos partido tabata hopi habri y tabata hopi dispuesto pa yega na solucionnan, esey a sucede”, Figaroa a expresa.

Tambe, el a comenta cu nan tin un relacion di 31 aña di un CAO cu tabata practicamente mesun cos, unico cos cu a cambia ta e punto cu nan ta negocia tur biaha pero, e biaha aki, tin un concepto mas nobo, algo mas pa lesa, mas modernisa den un lenguahe mas actual. Banda di esey, nan a logra tambe beneficionan normal cu ta wordo menciona den un CAO pero nan tambe a logra diferente beneficio nobo di e cual algun di nan ta pa prome biaha den e sector hotelero.

“Esey sigur pa nos ta un logro grandi como FTA y nos a bay pa cuater aña ora e maximo averahe di duracion ta di tres aña pero door di contenido di e CAO y door di cierto proyectonan cu tin tambe pa futuro di Hilton, a kies pa bay na un duracion mas largo y tambe pa tin un stabilidad di parti di empresa pero tambe di parti di e trahado”, Figaroa a finalisa.