Hotel causando molester grandi; Comunidad local organisando protesta contra hotel St. Regis

Despues cu un par di siman atras, e instalacion di parasol na Palm Beach dilanti hotel St. Regis a causa indignacion den comunidad, e malcontento ta continua. Diferente usuario riba rednan social ta expresa nan disgusto, pero tambe ta organisando den forma di protesta.

Por recorda cu poco mas cu dos siman atras, riba rednan social a circula un potret mustrando un cantidad di parasol cu a pone den santo canto di lama dilanti hotel St. Regis, cu desde esey a habri su porta. Turista y local a reacciona cu disgusto pa loke hopi a considera un invasion di e beach publico.

No ta un secreto cu e construccion di mas hotel ta un topico sensitivo, specialmente pa e ciudadanonan local cu poco poco ta sinti cu nan ta perdiendo nan derecho como ciudadanonan di e isla pa haci uso di e lamanan di Aruba libremente. Na mas di un ocasion a bin dilanti casonan den cual ciudadanonan ta expresa nan malcontento pa motibo cu cierto hotelnan kier apodera di e lama, of ta pone palapanan riba lama y kier pa esakinan ta priva solamente pa nan bishitantenan.

Na Aruba tin e ley ‘Landsverordening openbare wateren en stranden’ (Ordenansa nacional awanan publico y nos playanan) cu ta stipula cu tur lama na Aruba ta publico. E ley ta dicta: “Den e ordenansa aki y e disposicionnan basa riba dje ta compronde cu awa publico ta awa cu ta accesibel na tur, limita of no, den virtud di normanan di derecho publico.”

Den nos Editorial e siman ey, Bon Dia Aruba a bin cu sugerencia:
“ Si e hotel den e caso actual ta haya cu nan tin derecho di pone parasol riba tereno publico, esey no ta asina y ta significa cu un persona, local o un huesped di otro hotel, por bay sinta eynan tranquilamente pasobra nan no ta riba tereno di e hotel. Claro cu, como nos ta hende pacifico, nos no a trece e experiencia di pasado pa invita incidente o agresion, y e mihor manera pa evita esey ta pa autoridadnan concerni tuma rienda den e asunto aki y regla esaki manera nos reglanan legal ta stipula. Caso contrario, no mester ta sorprendi si tin ciudadano cu toch kier haci uso di nan derecho.”

Mientras tanto, en berdad ciudadanonan local a cuminsa tuma over e espacio na Palm Beach. Recientemente riba rednan social, un usuario a comparti su experiencia unda a yega e beach trempan y a simplemente kita e stoelnan di e hotel, cu no tabata den uso, y a pone nan propio stoel pa disfruta di e beach. Nan a indica cu en berdad dos personal di seguridad – presuntamente di e hotel – a acerca nan pa nan move, pero sin exito. E ciudadanonan aki, conociendo ley di nos isla y haciendo uso di nan derecho, a mustra e personal di seguridad cu nan no lo move y a keda tranquilamente riba e beach. Y te unda por a compronde for di e post, e incidente a keda asina tambe.

Y ta parce cu habitantenan di Aruba ta bay sigui protesta e situacion na Palm Beach.
Conocido activista ambiental, Nigel Maduro, a indica riba su pagina di Facebook cu tin un protesta ta siendo organisa “contra St. Regis” y cu no ta su persona a organisa e protesta e biaha aki.

E no a duna mas informacion publicamente tocante e protesta, indicando solamente cu “mi a haya sa door di un broadcast,” pero si a comparti mas informacion den mensahe priva cu su siguidornan, cu den comentarionan tabata pidi pa haya sa mas di e protesta.

Sinembargo, con largo of dificil e lucha pa recupera beachnan na Aruba ta bay ta, ainda no ta conoci. Manera otro usuarionan di rednan social a indica, esaki no ta prome biaha cu ta protesta contra desaroyonan asina. Ambientalista y periodista di Bon Dia Aruba, Dilma Arends, a indica cu “nos a yega di organisa/ participa den hopi protesta… no ta prome biaha. A colecta mas di 3 mil firma contra Ritz Carlton, p.e plus demostracionnan. E no a traha suficiente.. obviamente.”