Dr. Horacio Oduber Hospital a yega na un areglo di “suspension” di relacion di trabao cu ciruhano dr. Randy Tromp y esaki tabata basa riba un acuerdo comun. Asina hospital a informa pa medio di un memofecha dia 31 di augustus 2021, cu tambe a bay pa henter personal di e instituto medico.
Bon Dia Aruba a ricibi e memo interno aki for di hospital, despues di a ricibi un carta anonimo, cu ta bisa cu mas bien Direccor di HOH Jacco Vroegop, hunto tres, awor ex colega di dr. Tromp a percura pa e dokter bay. Segun e carta, tur instancia, for di AZV te Asociacion di Specialista tabata na altura di e sucesonan pero nunca a saca man pa soluciona e problema. E carta a drenta redaccion di Bon Dia Aruba sin un firma, y como tal, siguiendo reglanan di redaccion, no a publica e carta mirando cu e no tabatin firma y no tabata conoce su origen.
Sinembargo for di hospital mes a bin reaccion, sin cu a publica e carta, hunto cu e promesa cu ta splica kico a sucede.
Sinembargo e splicacion no ta varia na locual e carta anonimo a manda, cu ta e memo cu e personal di HOH a ricibi, esta cu e terminacion di relacion a bay den acuerdo mutuo, particularmente despues cu ambos a considera cu ta prudente pa crea trankilidad cu tur partido envolvi. HOH a gradici Dr. Tromp pa su dedicacion na su pacientnan, hospital y coleganan.
Segun e memo, no tin problema cu continuacion di trabao cu partida di dr. Tromp, kende lo keda den contacto y disponible pa informacion necesario.
For di otro fuente, Bon Dia Aruba a comprende cu tabatin tension entre directiva di HOH cu dr. Tromp pa algun tempo caba y finalmente e dokter specialista mes lo a dicidi cu ta suficiente.
