Algun tempo pasa e caso di fraude na laboratorio di Hospital Horacio Oduber a hala hopi atencion. Despues a bira keto… y esey den un caso unda casi un miyon florin di placa di comunidad a disparce.

Placa di comunidad pasobra finalmente ta nos seguro medico AZV ta core cu e gastonan aki. Bon Dia Aruba a trata di haya mas informacion con ta para actualmente cu e caso aki, unda supuestamente Paptestnan lo a bay Hulanda pa analisis, mientras cu anteriormente tabata procesa e testnan na Aruba mes. Nos a logra di haya un reaccion di entre otro Hospital, AZV y Ministerio Publico riba e asunto aki.

Di vocero di Hospital, sra. Charlene Huntington, nos a haya tende cu actualmente Hospital tin un caso den corte entama contra e dos personanan implica y ta prefera di no duna mas comentario riba esaki. Riba nos pregunta a confirma cu tabatin un rapport traha caba cu a evalua e asunto, pero no por duna mas comentario riba esaki. Tambe nos a haci e pregunta si ta e intencion pa haci un denuncia na Ministerio Publico como cu ta obvio (pa nos, red.) cu ta trata aki di un delito cometi na Aruba, y ademas no un chikito. Riba esey atrobe nos a haya e contesta cu na e momento aki no por comenta. Tampoco nos por a haya sa ki tipo di caso ta den corte actualmente. A confirma pa Bon Dia Aruba cu actualmente ta haci e testnan na Aruba mes, pero no por a duna un prijs pa esakinan.

For di vocero di Ministerio Publico, mr. Ann Angela, nos a haya di comprende cu ta pendiente di loke Hospital ta bay haci cu e caso. Sin embargo, nos a puntra tambe pakico Ministerio Publico riba su propio iniciativa no ta entama un investigacion penal, mirando cu asina hopi detaye di e caso a bin dilanti caba den publicidad, tambe pero no unicamente di banda di Hospital mes. Riba esey nos lo a haya un contesta ainda. Nos a referi den esey na e caso Ibis, unda supuestamente algun indicacion riba Facebook a duna inicio na e investigacion di Ministerio Publico, cu a conduci na caida di e ministro envolvi. Pues tin precedente na Aruba cu ministerio Publico por actua riba su mes iniciativa.

Nos tabatin un conversacion tambe cu vocero di AZV, sra. Solange Tchong, cu a informa nos cu AZV ta pendiente pa haya informacion final di Hospital, cu mester responsabilisa e gasto haci aki. AZV tambe a comprende cu tin un rapport caba riba e caso, pero cu esaki no a yega cerca AZV ainda. Di banda di AZV ta confirma cu e daño financiero ta pa AZV, cu ta paga e gastonan haci pa Hospital y tambe den e caso aki di e laboratorio.

Pa recapitula algun dato basico di e caso: ta trata aki di algo mas di 2.000 Paptest cu lo mester a bay Hulanda pa analisis. Sin embargo, a bin resulta cu esey nunca a sucede y cu a procesa e testnan aki mes. Como cu e procesamento di e testnan na Aruba ta costa un fraccion di e 190 euro cu e empresa na Hulanda, cu tabata aparentemente un front pa e hefe Hulandes di e laboratorio, a cobra Hospital y finalmente AZV, lo a paga u suma exagera pa un trabao cu nunca a tuma lugar, en todo caso no na Hulanda. E suma total envolvi tabata core den mas di 440.000 euro, casi 1 miyon florin, calcula pa redaccion di Bon Dia Aruba na promer instante ora a publica e noticia di primicia dia 19 di juli 2019 (por haya acceso na esaki door di scan e QR code), pero tambe confirma despues pa ex-director di Hospital den un rueda di prensa.

Nota di redaccion:

Ta inimaginable cu tanto luna despues cu e sucedido a sali na luz di dia, ainda no tin un claridad riba e asunto aki. Tin basta tempo cu e rapport ta disponible, pero no tin ningun avance den e caso. Awor ta haya tende cu tin un caso den corte contra e dos culpablenan, loke dificilmente por ta algo otro cu un caso di disolucion di contrato laboral. Un posible indicacion cu no tin intencion di bay Ministerio Publico mes cu un denuncia… Si esey resulta berdad, anto Hospital ta drechando caminda pa ofrece e dos culpablenan un ‘easy way out’? Anto por lo demas tur instancia cu mester actua, di e directiva di fundacion di laboratorio, di Hospital, di AZV, y OM ta para wak otro? Ora cu pueblo bisa cu ‘claro cu nada ta pasa, pasobra tin Hulandes envolvi aden’, nos tin sigur cu tin hende ta rabia y zundra cu tin hende den comunidad ta discrimina. Kico otro nan mester pensa?