Hospital ta prepara pa amplia capacidad den cuido di Covid

Hospital ta anticipando un cantidad nobo di pacientnan cu Covid kendenan mester keda interna. Asina vocero di Dr. Horacio Oduber Hospital Charlaine Huntington a bisa Bon Dia Aruba. “Nos ta anticipa esaki, y ta p’esey ya a pone cla, cu si en caso ta necesario, lo tin un departamento adicional, cu ta cla pa pacientnan cu Covid.

Esey ta nifica cu e cantidad e ora lo ta di 60 cama, cu no ta den Cuido Intensivo.” Pues, comunidad no mester tin e preocupacion cu no tin capacidad pa atende casonan.

Presion negativo

Huntington tambe a splica cu tampoco mester tin miedo cu por ‘catch’ e virus basa riba e hecho cu tin pacientnan cu Covid19 interna. E salanan ta bon seya. “E ventilacion ta kita e virus. E ta diseña pa trata hende cu malesa infeccioso. Manera, tuberculosis, influenza y Covid tambe. Ta cambernan cu tin presion negativo.” E siguransa aki mester kita cualkier duda cu e virus lo por plama memey di otro pacientnan cu ta interna na hospital.

Desde Maart ta test

Riba e pregunta si hospital tambe ta trata di gara e virus mas lihe posibel, e vocero a bisa cu esaki ta sosode desde Maart caba. “Di e tempo ey, hospital ta test tur pacient cu cualkier problema di pulmon of inflamacion den sanger, of cu tin un di e sintomanan cu por indica cu ta trata di Covid. Di e forma aki ta purba gara tur pacient di Covid19, prome cu drenta hospital.”

Scoge pacient

Siman pasa ainda, Crisis Team a adverti comunidad di Aruba, cu si no bin un reduccion den e cantidad di infeccion, ta bay pone un presion e cuido di hospital y ta bay yega un momento cu dokternan lo mester dicidi ken ta trata of no. Manera ta conoci, esaki ta scenarionan cu a mira na paisnan manera Italia, Spaña, pero tambe na Latino America, na momento cu hendenan vulnerabel, particularmente hende grandi tabata keda infecta na cantidad grandi.

Sinembargo, hospital mes no ta kere cu por lo pronto Aruba no ta den e situacion ey. “Nos, conhuntamente cu e Crisis Team ta haci tur locual ta den nos alcance, pa asina mester preveni ken si of ken no nos lo mester bay trata pa motibo di scarsedad di luga den hospital,” ta e comentario di vocero di hospital, Charlaine Huntington.