Asina a duna di conoce CrisisTeam ayera atardi na unda nan a informa cu pa motibo di e aumento drastico di casonan di Covid-19, hospital ta escala y mester cancela cuido electivo.

Den caso aki, nan lo atende solamente casonan di urgencia pa asina por traha capacidad y espacio pa atende cu pashentnan di Covid, di mesun forma Dr. Horacio Oduber Hospital ta lamenta cu mester a tuma e paso aki, sinembargo ta un paso necesario pa por garantisa cuido di tur ciudadano.

Nan ta haci un apelacion riba tur ciudadano pa no acudi na Hospital pa cuido cu no ta di emergencia y cu no ta necesario mesora, y tambe tambe nan ta pidi pa ciudadanonan bay trankilo den trafico y evita causa accidente, pasobra cada victima di accidente den trafico ta tuma mas cama den hospital.

CrisisTeam lo ta evaluando ki paso mas mester tuma, y ta haci un apelacion serio na tur ciudadano pa cuida nan mes y nan famia.

Un cambio cu nan a tuma na cuenta di un dia pa otro na unda cu durante un conferencia di prensa di Gobierno di Aruba diahuebs ultimo a wordo treci dilanti cu e situacion na hospital te ainda tabata mantene bao di control, segun loke prome minister demisionario Evelyn Wever-Croes a indica.

Esaki tambe tin cierto medidanan cu manera el a sigura no ta esunnan di mas agradabel pero na final ta medidanan cu ta bay hopi leu y cu situacion tabata bao di control, “nos kier evita cu na cierto momento e falta di capacidad na hospital ta afecta no solamente economia pero na prome luga salud di nos ciudadanonan, esey ta nos meta, percura pa mantene e capacidad di hospital cu cabes riba awa”, Wever-Croes a declara.

Tambe, tambe por a mira cu den conferencia di prensa na unda miembronan di Crisis Team tabata presente a hala atencion cu na e momentonan aki cu Aruba ta den un di su pio momentonan enfrentando e pandemia di Covid-19, minister demisionario di Salubridad Dangui Oduber no tabata presente, Wever-Croes a informa cu e ta cu vakantie.

Tambe, Dr. Caceres di Dr. Horacio Oduber Hospital a presenta na e conferencia di prensa aki pa splica cu e situacion na e momentonan aki ta serio na unda nan tin un reto hopi grandi pa deal cu tur e pashent aworaki.

Te ayera atardi na hospital tabatin 54 persona interna di e cual 7 ta den ICU, 41 riba piso general, 4 riba piso di maternidad (hende muhe na estado) y 2 den area di pediatria, di esaki Caceres a señala cu siman pasa e cifra tabata na 20 y dos siman pasa tabata 5, esey ta nifica cu awor nan tin 9 biaha mas hende den hospital compara cu siman pasa.

“Si e sigui subi manera aki, hospital ta bay yena cu solamente Covid-19 y corda cu nos tin otro pashentnan tambe cu nos tin cu yuda”, Caceres a expresa.

El a bisa cu tur e medidanan cu Crisis Team ta tuma ta pa asina por controla e cuido, hospital ta brindando e cuido sigur pa tur e pashent y nan kier sigui haci esey manera el a enfatisa, ta p’esey cu nan tambe a tuma medida cu tur pashent cu tin cu wordo hospitalisa of tin cu opera mester haci e test di Covid-19, esaki ta pa motibo cu e pandemia ta asina halto akinan na Aruba cu mas cu un persona no tin sintoma of ta sconde e sintomanan pa tambe haya e operacion nan kier ta sigur cu e persona no ta contagia cu Covid-19.

Si un persona ta contagia y ta drumi hunto cu otro hendenan den un camber e problema por bira grandi pa e otro pashentnan cu ta eyden, ta p’esey cu for di diamars ultimo nan a cuminsa haci e test tur hende cu ta wordo acepta den hospital.

Di mesun manera, el a sigura cu na e momentonan aki tin tiki personal na hospital y si esey ta cay afo nan no por yuda ni un hende mas y pa e motibo ey el a pidi pa hendenan pa ta sincero cu nan mes y cu nan famianan, si e test ta sali negativo e operacion ta bay door, manera Caceres a comenta.

“Ainda nos por opera tur hende cu por pero na dado momento nos lo tin mester di personal di operatie camer pa bay yuda riba piso pasobra nan lo tin cu cera operatie si tin mester, “pero nos no kier yega eynan”, el a sigura.

Ademas, el a afirma cu nan tin cu haci test na unidad di maternidad cu tambe tin pashentnan cu Covid-19 cu hopi di nan no ta vacuna, a pasa cu nan a mester termina e embaraso prome cu ta necesario, e baby ta nace mas prome di su tempo pa motibo cu e mama ta asina malo cu e no por warda te e dia cu por haya su yiu.

Ta p’esey cu muhenan cu ta na estado por vacuna pa motibo cu nan lo keda sigur y cu esey no lo haci daño na embaraso ni na e baby y asina por evita yega na hospital y baby por nace prome cu ora.

Tambe, Caceres a confirma cu tin muchanan cu a haya Covid-19 pero den hospital no tin hopi caso di e sorto aki.