Na 2005 e tabata 95 miyon florin y 9 aña despues 156 miyon florin
Recientemente gerencia di hospital a firma un CAO pa tres aña cu ta trece trankilidad y un pas laboral. Sinembargo, e gasto di hospital ta aumenta cada aña, specialmente riba personal, esaki ta haci cu negociacion di CAO lo tin su retonan pa futuro.
Tin biaha e partinan envolvi den negociacion di CAO, no por yega na acuerdo facilmente riba parti financiero, ya cu hospital tin un cierto entrada cu ta bin fei AZV. hospital mes no ta genera fondo, y masha poco nan ta haya entrada for di e pashentnan priva. Esun cu ta pone e fondo pa hospital por cubri su gastonan ta nos seguro general, esta AZV.
Suma disponibel
Anualmente AZV ta pone un suma disponibel pa hospital por atende cu nan gastonan di operacion y obligacionnan. Na 2005, hospital a haya fei AZV 95 miyon florin. Pero 8 pa 9 aña despues, e mesun hospital aki, logicamente cu mas trahado y mas gastonan, a ricibi entre 151 y 156 miyon florin entre 2013 y 2014.
Mediador di Gobierno, sr. Anselmo Pontilius ta haya cu niun hende mester spanta pasobra tin e gastonan aki, ya cu den cualkier pais na mundo e gastonan di remedi y di salubridad ta grandi. E ta considera cu nos mester ta orguyoso cu Aruba tin un sistema di seguro general cu ta percura pa cubri gastonan.
Pero AZV pa mantene su fondo dor di prima di e trahado y e dunado di trabou. Y si tin falta di placa of deficit, gobierno mester cubri esaki for di su presupuesto. Pero si antes e fondo pa atende gasto di hospital tabata bay for di caha di gobierno directo cu ta caha di pueblo of esun cu ta paga belasting; aworaki e ta bay via AZV cu ta e organo legal pa atende cu seguro general di nos comunidad.
Gasto
Horacio Oduber Hospital ta nos unico hospital cu 900 trahado, y e ta un dunado grandi di trabou cu compromiso enorme. “Mundo medico ta un profesion cu bo tin cu paga un salario formidabel. Den sentido cu e mester ta un salario cu un hende merece pa e tipo di trabou cu nan ta eherce”, asina Mediador di Gobierno a bisa.
Sr. Pontilius a indica cu un di e gastonan normal den cualkier empresa, y den caso di hospital no ta un excepcion, bo ta haya cu gastonan di personal ta uno cu ta pisa hopi. Na 2005 hospital tabatin un gasto di 61 miyon florin y na 2014, e ta 100 miyon florin.
E otro gastonan ta e gastonan medico cu na 2005 e tabata 19 miyon, y pa 2014 el a bira 37 miyon florin. Nos ta mira cu e costo pa atende cu e pashent, paga trahado, cumpli cu paga e servicionan di operacion ta un costo enorme.
“Den un caso asina ta dificil pa negosha un contracto colectivo. Pasobra hospital ta bisa bo, mi ta limita na fondonan cu mi por duna e trahadonan y mi tin cu tene cuenta cu mi tin otro compromisonan pa cumpli cun’e”, el a bisa.
Sr. Pontilius a bisa cu e cifranan aki ta duna nos un bista tambe con nos por plania pa futuro. Ya cu si bo tin cierto suma di entrada anual, e pregunta ta den e proximo 5, 10 y 15 aña, con e gasto ta bay ta. Nos tin un comunidad cu ta aumenta hopi den edad, y esaki ta trece cun’e mas gasto tambe di remedi. Ta bon pa traha preventivo pero evidente ta cu hospital tin un gasto enorme.
