Ayera mainta, seis aña despues cu e proyecto di renobacion y expansion a cuminsa, finalmente a tuma luga e inauguracion oficial di area A cu ta bira entrada principal di Horacio Oduber Hospitaal (HOH). E ta e penultimo fase di e proyecto aki prome cu e ta bin totalmente cla otro aña.
E ceremonia senciyo aki a conta cu presencia di Minister di Salubridad, sr. Dangui Oduber, Hunta di Directiva di HOH representa pa Sr. Gregory Croeze, Comision di construccion di HOH y tambe representante di SOGA. Tanto minister Oduber, como Sr. Croeze a hiba palabra caminda a wordo anuncia cu pa inicio di 2022 e proyecto di hospital lo bini totalmente cla.
Nan ta bay cera e entrada principal cu nos tur ta conoce pa cuminsa cu e trabao di renobacion den e area aki. E trabao aki ta bay cuminsa pronto y e ta bay tuma entre 8 pa 10 luna pa renoba. Asina nan por keda cla cu e proyecto y tambe cu e tower A di HOH.
Sr. Croeze kende ta encarga cu e parti financiero di HOH a trece dilanti cu un aña pasa e area aki tabata den un luz negativo debi na un candela cu a tuma luga na luna di juni ultimo. E incidente aki a ocasiona un tardansa den entrega di e fase aki aña pasa. E area aki tin entre otro e parti di registracion y facturacion, endoscopy, wound care, etc.
Sra. Ilse de Cuba tabata persona encarga di corta e cinta di inauguracion di e area A. E tin 37 aña trahando na servicio di HOH, y 20 aña como cara di hospital. Sra. de Cuba a declara na Bon Dia Aruba cu el a sinti su mes honra cu hospital a tuma cuenta cu como e ta cara di e instituto aki e por ta parti di e area nobo aki.
Igualmente e ta sumamente orguyoso di nos hospital pasobra “e ta kedando hopi bunita.” E ta kere cu unabes e proyecto aki ta completamente cla, Aruba lo tin un hospital hopi moderno pa beneficio di nos comunidad.
