Locual tabata di bira un celebracion, a termina den tragedia pa un famia na Tennessee.
Despues di parto, durante nan estadia den hospital, docternan a confundi nan baby
cu un otro y a haci operacion innecesario riba dje.
E baby Nate a nace sin ningun problema na University Medical Center den Lebanon cerca
di Nashville. Despues di e parto, e mama Jennifer Melton a pensa cu nan a tuma su baby
pa bai haci un check up. Ora cu nan a regresa cu e baby, e la bira histerico despues cu e la mira kico nan a haci cu su yiu.
‘’E enfermera a splica nos cu nan a opera e baby su lenga, e la haya un procedura
cu yama Frenulectomy, caminda e cuero parti abou di e lenga ta wordo corta’’ Melton
a bisa afiliado di CNN WTVF.
5% di baby ta nace cu un forma di ‘tongue-tie’ caminda e cuero bao di lenga ta muchu preta y lo por causa problema pa come of papia den futuro. Esaki tambe por causa problema ora di duna pecho.
‘’E tipo di cosnan aki no ta acceptabel, no por opera riba un baby sano, no por confundi
un baby pa un otro den hospital’’, Clint Kelly, e abogado di famia a conta WTVF afiliado di CNN.
E docter a reclama cu: ‘’Mi a pidi pa e baby robes. Mi a haci operacion riba e baby robes, mi a admiti cu mi a haci fout y mi a pidi disculpa’’.
Mayoranan y e abogado awo no sa con lo para cu baby Nate den futuro.
‘’Awo nos no sa si e mucha ta bai tin problema pa come of papia. E asunto ta cu
esaki tabata un baby cu a nace sano y tabata cla pa sali for di hospital, e operacion tabata innecesario’’, Abogado Kelly a bisa.
‘University Medical Center’ a nenga di duna comentario specifico tocante e caso aki.
