– Hospital Horacio Oduber kier mehora su servicio telefonico y lo haci un encuesta anonimo entre pashentnan cu ta tuma contacto telefonicamente cu e policlinicanan.
E encuesta ta completamente anonimo y lo tuma luga desde dia 13 di maart pa dia 30 di maart. E meta final ta pa mehora e servicio telefonico. Charlaine Huntington, gerente di e departamento di comunicacion, a duna di conoce den un comunicado cu Bon Dia Aruba a ricibi, cu ya pa algun aña hospital tin su encuesta Duna bo opinion pa pashentnan cu ta wordo interna, pa asina midi e calidad di servicio cu ta ser brinda.
“E biaha aki a dicidi di enfoca riba e servicio telefonico cu ta ser brinda na nos policlinicanan, y pa e encuesta aki a scoge poli gynaecologie, poli urologie, y poli long”, sra. Huntington ta splica. Si un pashent a bishita durante luna di januari y februari un di e clinicanan aki e por spera yamada di un tercer persona cu no ta traha na hospital cu lo bay haci e encuesta aki. Un encuesta completamente anonimo cu un total di 20 pregunta.
E preguntanan ta basa riba con lihe a contesta telefon, si e pashent a ricibi e servicio desea via telefon y mucho mas, pues preguntanan a caso cu por yuda e policlinicanan mehora nan servicio, den e caso aki di telefon.
“E encuesta ta completamente anonimo, pues ta pidi pa participa y duna bo opinion manera cu a experiencia esaki, pa motibo cu e opinionnan aki di nos pashentnan lo yuda mehora e servicio cu ta brinda via telefon”, sra. Huntington ta menciona.
“Si bo persona a yama y nan no a contesta, duna esaki di conoce. Si nan a trata bo tremendo, tambe nos kier tende, pasobra esey por duna e secretaria di e poli un empuhe pa sigui haci un bon trabou”
