Hospital investigando problema di aire

Diaranson ultimo durante oranan di mainta hospital tabata tin un situacion fastioso, ora cu e circulacion di aire tanto den sala di operacion como na departamento di botica no tabata funcionando bon.

Empleadonan di departamento di botica ya tabata tin mes un keho siman pasa y esaki a causa cu nan a salo pafo di e departamento. Nan tabata keha manera dolor di garganta y dolor di cabes. Esaki ta segun e relato cu nos a ricibi di hospital.

Gerente a yama pa asina e pa asina e personanan cu ta haci e trabou aki bin pa midi y controla e aire den botica. E resultado a mustra cu no tabata tin nada particular. Pues, no tin causa conoci ainda pa esaki. Empleadonan di botica a reanuda trabou pero lo sigui haci investigacionnan pa preserva e bon salud di e empleadonan.

Pa loke ta e sala di operacion tambe algun empleado a sinti malo y a notifica AO conforme protocol. A pidi ayudo na brandweer cu a midi y no por a constata peliger. No tabatin holo penetrante e biaha aki, pero teniendo e proteccion di pashentnan y alabes empleado na cuenta a dicidi pa atende solamente pashentnan cu ta caso di emergencia. Pa tur otronan lo planea un dia di operacion nobo. Un decision siguramente no facil pero necesario pa cu e salud di pashent y empleado cu ta drenta diariamente. Pa motibo di varios notificacion di AO na e sala di operacion lo sigui drey un programa adapta mientras lo sigui comunica cu e personanan concerni. Hospital ta pidi comprension y cooperacion pa asina por continua e proceso di cuido na un manera sigur y optimal.

Siman pasa dialuna tambe tabatin un problema cu aire na departamento di radiologia unda algun empleado a notifica AO. A haya e causa y a soluciona e problema di aire y desde diahuebs siman pasa e departamento aki ta funciona normal bek. E motibo di e problema di aire na botica y sala di operacion no ta mustra di ta igual y pa tur dos ta conta cu ainda esakinan ta desconoci.

Hospital ta sigui cu investigacionnan y ta spera di por resolve e problema aki lo mas pronto posibel pa asina por sigui brinda nan servicio normal bek.