Durante apertura di Siman di Enfermeria, minister di Salud Publico a cuestiona e echo cu ainda hospital no a traha ni entrega un plan pa yena e 20 vacatura cu den enfermeria p’asina aloca e fondonan cu ta necesario. Sinembargo Bon Dia Aruba a consulta cu presidente di Hunta di Supervision (RvT) di hospital kende ta bisa cu e plan tey pero nan ta den discusion riba AZV pa e asunto di ampliacion.
Den cuadro cu di renobacion y ampliacion di HOH, e mandatario a boga pa Raad van Bestuur (RvB) y RvT pa entrega mas pronto posibel nan plan riba con nan ta bay mehora e falta di enfermero cu a bira un carga pisa pa e personal di cuido di pashent den HOH. Di su banda, presidente Gino Goeloe di RvT a laga sa cu “e plan t’ey” pero e plan no a wordo presenta na minister den cuestion, sino cu a wordo entrega na AZV. “AZV ta esun cu ta duna nos e placa pa cu e cuido akinan den hospital. E plan t’ey.”
Enfermera cualifica
E plan ta cla caba pero na e momento aki HOH ta den discusion cu AZV pa atende cu asunto di ampliacion, segun sr. Goeloe. Aunke e mandatario a bisa cu tin placa, sr. Goeloe ta spera cu ora e plan yega su dilanti e por bis’e “e placa t’ey”. Sr. Goeloe no tin duda cu e mandatario lo percura pa e placa necesario wordo aloca debidamente pa atende cu asunto di mas personal den hospital. “Nos mester di dje. Nos no por bay den un edificio nobo sin enfermera cualifica.”
E ta añadi cu nan como hunta di supervision di HOH, kier y ta exigi calidad, pa cual nan tin dos aña caba ta preparando pa logra esaki. Nan ta treciendo hendenan profesional di Hulanda pa forma y educa nos personal di enfermeria y tambe esun di specialisacion. Nan tin enfermera caba pa ora cu HOH bay over den hospital nobo, pero ainda falta mas.
Vacaturanan
Prome cu e plan ta wordo entrega nan lo tin un reunion cumbre pa wak berdaderamente cual departamentonan ta falta hende. Segun e plan presenta na AZV, hospital tin mester di 20 enfermero(a) den totalidad pa e departamentonan nobo. El a splica cu den esey tin specialisacion tambe. “Enfermera basico tin pero nos mester bay educa nan den un curso di dos of dos aña y mey”, sr. Goeloe ta bisa. Ya caba HOH ta organisando programa di capacitacion specialisa pa nan personal di enfermeria. For di 2 aña pasa caba nan ta biniendo cu curso y training entre otro pa enfermera riba e parti neurologo y tambe di emergencia y cuido intensivo (intensive care).
Sr. Goeloe ta bisa cu sigur HOH mester 20 enfermero mas. E ta comparti e ponencia di e mandatario di Salubridad Publico cu e trabou a bira pisa pa e personal di HOH, ya cu nan a bay entre otro di 10 pa 17 cama di emergencia. “Pa bo yen’e bo mester enfermera cualifica, diploma y specialisa pa traha cu e pashentnan.” Actualmente nan a recluta 11 enfermero/a nobo; pero nan ta preparando academicamente y nan ta caba otro aña. Na banda di esaki, nan mester 20 mas pa distribui nan den e departamentonan nobo y bieu. Principalmente nan mester hendenan pa traha na cama pa cuida e pashent.
E ta declara cu tanto Consehonan di Directiva como esun di Supervision ta para tras di e decision di tuma mas trahadonan den servicio. “Pasobra nos kier pa nos hendenan wordo cuida.”
