Segun fuente fidedigno den sector comercial, Hospital Horacio Oduber ta haya su mes forsa pa extende e pagonan na comercio local pa entrega di diferente servicio y mercancia. Den cierto caso ta papia caba di atraso di 120 dia pa por cobra. Esaki ta hincando e empresanan aki den problema, pasobra nan productonan tur ta cumpra den exterior, unda te na cierto punto por haya cooperacion di nan suppliernan aya, cu tambe tin cuenta pa paga. Esaki finalmente ta haci henter e asunto mas caro tambe, pasobra ta logico cu tur esaki ta causa extra gasto di interes pa pagonan atrasa. Problema cu entrega di cierto material clave na hospital ademas por afecta servicio na pueblo y esey naturalmente ningun hende ta desea.
Un prome pregunta ta si e problema aki ta origina cerca hospital mes. Di inmediato nos por bisa cu esey no ta asina. Hospital ta depende completamente di AZV pa por haci su pagonan. Un bista cerca AZV ta necesario anto. Kico ta e problema cerca nan? E problema tin algun faceta importante. E prome ta cu entradanan regular cu AZV mester haya for di prima di AZV y entrada via BAZV ta kedando atras compara cu e pronosticonan. Esaki tin su origen den e estado di economia na e momento aki. Manera nos a publica algun tempo atras, economia no ta canando manera mester ta y esey tin influencia tanto riba prima como e BAZV cu AZV mester haya. For di rapport di gobierno riba e prome tres luna di 2016 y tambe reaccion di CAFT riba esaki, por conclui cu mester a adapta e pronostico economico pa e aña aki, manera Banco Central a haci den nan Economic Outlook publica na april 2016. Den esey, Banco ta baha e pronostico, cu tabata di un GDP nominal di 5203 miyon florin pa solamente 4922 miyon florin (2015: 4835 miyon). Naturalmente cu esaki tin di haci tambe cu e hecho cu no tin ningun actividad ainda den e refineria, mientras nos ta drentando di ocho luna di aña. Di e manera aki por descarta cu e proyecto di rehabilitacion lo bay contribui hopi e aña aki na economia.
Pero, pa keda cerca e problema directo pa AZV/Hospital, ta interesante tuma nota di loke CAFT ta bisa den su reaccion riba e rapport di gobierno riba e prome kwartaal 2016. CAFT ta observa cu gobierno den su presupuesto 2016 ainda ta tuma como punto di salida e GDP halto pronostica anteriormente, mientras cu por mira cu e entradanan di BBO, BAZV y impuesto di importacion ta den linea cu e pronostico nobo mas modera di Banco Central, esta cu nan ta considerablemente menos. CAFT ta sigui bisa cu na inicio di aña AZV tabatin un presupuesto balansa. Esaki a cambia ora cu gobierno a cambia algo: a baha e contribucion di gobierno cu 8,5 miyon florin (di 42,7 pa 34,2 miyon) y banda di esaki a calcula cu lo drenta menos na prima y BAZV pa motibo di menos actividad economico. Hunto AZV lo haya como 22,8 miyon florin menos, mientras cu ta trata di baha gasto cu 6,9 miyon, lagando un buraco extra di 15,9 miyon florin pa AZV.
Tur esaki ta haci cu cada luna AZV tin mas di un miyon menos pa pasa pa e partnernan den cuido medico cu ta depende di AZV pa haci nan pagonan. Hospital ta un di e clientenan grandi AZV cu solamente na cuido directo ta haya mas di 160 miyon pa aña. Un parti grandi ta naturalmente salario pa personal cu cual no por faya. Asina hospital ta haya su mes obliga di extende e terminonan pa pago, poniendo e problema den scochi di e empresanan cu tin hospital como cliente. E problema adicional pa e empresanan aki ta cu, den un pais chikito manera Aruba nan no por bira bende nan servicio o mercancia cu otro cliente. Nos ta papia aki di un mercado chikito y super specialisa. Un default di un empresa asina cu su suppliernan den exterior por tin consecuencia serio pa dunamento di servicio na hospital.
Pa AZV tambe e situacion no ta nada di gaba, aunke di otro banda gobierno ta keda cu e problema cu pa ley nan mester compensa e deficit cu AZV tin na fin di aña y den e sentido ey ta hunga caco scondi cu su mes, obligando AZV busca con pa austerisa casi 7 miyon extra. Otro pregunta cu a keda ta con por ta cu den e rapport aki CAFT ta señala cu:” un crecemento economico mas abao di un banda por conduci na menos entrada pa caha di gobierno, mientras cu di otro banda e gastonan por mustra un aumento na, entre otro, transferencia. E desaroyonan aki por haci cu e deficit financiero na 2016 ta sigui subi, pa cual motibo intervencion adicional lo ta necesario pa trece e presupuesto den linea cu e norma di LAft.” Despues profesor Bakker a tene rueda di prensa na Aruba bisando cu “Aruba ta bayendo bon, hasta sin entrada adicional di e refineria”… Cual di e Bakkernan nos mester kere?
