Ayera mainta hunta directivo interino di Hospital Dr.Horacio Oduber,representa pa Ronald van Trigt hunto cu presidente Freck Kerver y infectologo cu ta bay skirbi e protocol Bert Rodenburg,a ofrece un conferencia di prensa pa trece dilanti informacion pa e comunidad tocante coronavirus.

Van Trigt a duna di conoce con nan ta desea di maneha e contacto structural di e infeccion viral cu ta bayendo rond di mundo actualmente y cu tambe ta yegando na otro islanan di Caribe. Tocante esaki el a declara cu nan tin un ekipo completamente prepara pa algun siman caba, pa enfrenta cualkier situacion cu por presenta.

Un ekipo di 5 persona componi pa infecciologo, microbiologo, entre otro hendenan specialisa,cu sa con por atende cu un situacion asina. Tambe tin hende cu tin experiencia internacional y hopi capacita pa crea e protocolnan di defensa propio pa Aruba.

Di su banda, Bert Rodenburg, infectologo di Hospital Dr. Horacio Oduber a splica cu desde 6 siman aproximadamente nan a cuminsa traha protocol pa ta prepara, ya cu loke nan no kier ta cu na momento cu tin un pashent den hospital y despues di un siman lo haci un test, cu por resulta positivo, p’esey nan a cuminsa prepara hopi trempan.

Rodenburg a comenta cu siman pasa a cuminsa haci test. Aunke den e mundo ta existi e definicion di ‘caso sospechoso’ – cu ta un pashent cu tin problema di pulmon, a bishita paisnan cu tin coronavirus como por ehemplo, China of Italia – Nan a dicidi di testnan mas hende cu no necesariamente a bishita e paisnan aki, pa motibo cu nan no kier perde ningun pashent.

Den esaki, el a afirma cu a cuminsa test hende cu tin problema cu pulmon y ningun di nan a sali positivo. El a sigura cu ta riba tur cos pa ta bon prepara.

Asina mes, el a manifesta cu nan tin e protocol den varios luga di hospital y tambe ta den contacto tur dia cu otro instancia di Salud, pa tin e protocol bon conecta, door cu e mayoria di pashent por presenta pafo di hospital.

Dokter di cas y otro instancia di salud tin su protocol activa, Rodenburg a comenta, como tambe tin cu pone den definicion ken ta un pashent sospechoso di coronavirus. E protocol ta activa tur dia, segun el a bisa, pa motibo cu ‘e epidemia no ta fiho, e ta cambia tur dia’

Rodenburg a splica cu protocol tin dos parti importante; na prome caso e persona mester pone den definicion ken ta bay wordo test, pa motibo cu Aruba no por test tur hende. Di dos luga, si nan tin un pashent cu ta positivo, e pashent mester ta isola caba pasobra na momento cu ta haci e test ta pone e pashent isola y resultado di e test por tarda 2 dia.

Tocante e tempo di resultado, el a expresa cu ta trata di un test nobo y mester ta valido. Nan ta bay traha e test na Aruba, pero e resultado ta bin for di Hulanda. Despues di haci varios test nan mester ta sigur cu e resultado ta bon y nan por duna e resultado mas lihe, un dia kisas.

Rodenburg tambe a informa cu a pidi hopi material pa haci e test, pa motibo cu desde varios siman a haci e peticion caba. Di loke ta trata e area di waf y aeropuerto, el a señala cu nan ta papiando cu instancianan aki pa haya e paña protectivo y material necesario.

Asina mes, el a trece dilanti cu ora un pashent ta presenta sintoma di tos of keintura, Rodenburg a bisa cu mester yama dokter di cas preferiblemente y no bay na su oficina. Dokter di cas lo dicidi si e mester haci prueba of no pa cu e virus aki. Di esaki el a comenta cu no tur pashent mester bay hospital, pa via cu no tin capacidad pa test tur hende.

Rodenburg tambe a menciona cu por existi e posibilidad di crea ‘hotline’ pa e pashent por yama manera otro paisnan tin 24/7, e ta un posibilidad pero no a ser confirma te ainda.

Pa finalisa, Van Trigt a señala cu pa loke ta trata e localidad cu ta bay wordo usa pa isolacion, tin un na bista caba y hunto cu Ministerio di Salud y Directie Volksgezondheid (DVG) y otro instancia nan ta coordinando varios proceso. Tambecon nan por skirbi protocol pa loke nan tin cu haci ora un persona ta positivo y loke ta pasa cune, con por cuida e personanan cu a haya contacto cu e persona aki.

Nan tin dos procedura andando y un di nan ta e persona cu ta ‘bao sospecha’ y ademas e famia di dje, cu mester bay den ‘cuarentena na cas’ temporalmente bao supervision di instancianan.