Recientemente durante conferencia di prensa Minister di Turismo y Salud Publico, Dangui Oduber, a indica cu e aña aki hospital di Aruba a genera placa cu turistanan di region cu a ricibi cuido medico na Aruba, locual ta un avanse grandi pa loke ta turismo medico pa Aruba.
Minister Oduber a splica cu Aruba a haci avansenan caba den turismo medico y e aña aki hospital a trata mas di mil pashent for di Corsow, Boneiro, Saba, Sint Eustatius y Sint Maarten. “Hospital a genera hopi placa e aña aki for di turistanan den region,” el a indica.
El a agrega cu banda di esey Aruba a cera acuerdo cu Universidad del Bosque y Los Cobos, y tin interes pa haci inversion na Aruba pa explora turismo medico. El a indica cu tin companianan priva na Aruba cu tambe a haci inversionnan den cuido medico pa asina ofrece servicionan adicional na turistanan.
“E ta keda un enfoke di nos maneho pa keda explora e posibilidadnan cu turismo medico por brinda pa nos y mi ta convenci cu e acuerdonan cu nos tin, tin oportunidadnan nobo pa esaki,” el a remarca.
