Recientemente riba rednan social Bon Dia Aruba a tuma nota di un publicacion tocante un caso lamentabel na unda un persona a fayece y segun e publicacion a indica, tabata pa motibo di negligencia di eerste hulp. E publicacion a ricibi un cantidad di reaccion y comentario di personanan cu tabata expresa nan opinion tocante e servicio cu e departamento di emergencia di hospital ta ofrece.

Segun e informacion cu e pareha di e fayecido di inicialnan F.T. a duna den e comentarionan di e publicacion, e cabayero lo a bay eerste hulp mas cu siete biaha pa motibo cu e tabatin un dolor fuerte na su pecho, pero cada bes e tabata ser manda cas back, sin brind’e ningun asistencia pa averigua kico ta motibo di e dolor of ni pa yuda alivia e dolor.

Lamentablemente e persona fayece pa motibo cu no a ricibi ayudo medico niun di e biahanan cu el a bay eerste hulp. E fayecido a laga atras su pareha y nan yiu di dos aña.

E publicacion a ricibi un cantidad di reaccion y comentario di ciudadanonan cu a expresa nan palabra di condolencia na famia di e fayecido y alabes tabata expresa nan opinion, y propio experiencia, na eerste hulp.

“Te na momento cu bo ta den un situacion cu bo tin di bay e lugar nan aki bo por compronde. Bo por bay inconsciente trankilamente wardando pa bo beurt mientras bo ta tende gritamento/harimento di e trahadornan eyden. Mi a bisa loke mi a bis pasobra mi a pasa aden… Gewoon full nos sistema medico na Aruba ta estilo di ora un hende muri ta wak via autopsia kico a pasa e hende na luga di purba salba hende mientras e ta na boda,” un usuario a indica.

Otro usuario a comenta: “Dokternan di cas ta super bon purba yuda bo, pero loke ta HOH ta un cos di laga di desea, vooral madruga. Tin par cu no ta ni worry cu bo. Bo bay mainta of atardi ainda por haya un bon, bo bay den ora laat marduga, bo por wel di lubida. Poco hende trahando eyden cu no mester ta ni eyden pasobra ta parce den suite nan ta sinta bin traha djis pa papia combersa cu colega y djey bay cas.”

“Ta hopi storia tin di hendenan cu a muri pasobra eerste hulp no a tuma nan na serio y manda cas moribundo. Hopi tristo” ; “Hospital y eerste hulp (mester cambia nomber pa laatste hulp) ta draai rond di stagiaire di Hulanda y ta bin Aruba pa practica riba nos djey bay Hulanda back” ; “Nada nobo Horacio Oduber Hospital ta pesimo y no ta tuma responsabilidad,” ta algun di otro comentarionan di ciudadanonan.

Varios persona a expresa nan malcontento pa e servicio cu eerste hulp ta duna den varios caso, tin ta hasta bisa cu enbes di yama’e eerste hulp e mester bira “laatste hulp” ya cu hopi hende a yega di bin dilanti caba contando nan storia di mal servicio cu nan a yega di ricibi na e departamento di emergencia.

“Eesrte hulp ta asina negligente cu otro departamento di hospital mes ta manda famia di hende cu ta ser interna ora cu ya ta laat caba pa lanta caso contra nan pasobra nan ta hopi dehado,” otro usuario a comenta.

Manera cu varios ciudadanonan a menciona en e seccion di comentario di e publicacion, esaki no ta prome biaha, no ta e prome caso cu un persona ta experiencia posibel negligencia medico, of ta fayece pa motibo di esaki.

Na comienso di februari un dama Arubiano a publica su storia riba rednan social di su lucha cu un enfermedad. E dama aki, den su publicacion a conta con pa hopi tempo, 10 aña, e tabata lucha cu dificultad di salud sin sa kico tabata su diagnostico. Pero pa motibo di negligencia medico aki na Aruba el a tuma decision di bay Hulanda y busca ayudo medico eynan. Asina finalmente el haya respuesta riba tur su preguntanan, cu eventualmente a hiba na e diagnostico di endomiotrosis.

E dama aki a logra haya e ayudo cu e tabatin mester, pero no despues di a sufri innecesariamente pa hopi tempo pa motibo di negligencia medico na Aruba. Lamentablemente den otro casonan, manera esun di e cabayero F.T., e pashent no ta sobrevivi.

Tal ta un caso cu a sucede na aña 2017, ora cu e hoben di W.d.R. a fayece inesperadamente, y famia ta atribui esaki na negligencia medico.

Na 2016 tabatin un otro caso na unda un mama cu tabata na estado di morocho a fayece, sin sa kico realmente a pasa. Un persona cerca di e suceso a indica cu tabata pa motibo di posibel negligencia medico cu e mama y un di su babynan a fayece.

Bon Dia Aruba a tuma contacto cu Departamento di comunicacion di Dr. Horacio Oduber Hospital (HOH) pa puntra tocante e caso di e cabayero F.T. A puntra si hospital ta na altura di e situacion y si por brinda informacion pa trece claridad den e caso lamentabel aki.

Marleen Bakker, di Departamento di Comunicacion a splica cu hospital ta tuma nota cu riba plataformanan social ta circulando e publicacion cu pa motibo di negligencia na departamento di emergencia un pashent lo a fayece.

“Na prome luga, nos mas sincero condolencia na henter famia cu perdida di nan ser keri.

Nos ta lamenta e sucedido y a tuma nota di nan observacion. Nos como Hospital tin como prioridad pa brinda cuido di calidad diariamente na tur cu drenta nos portanan y ora esaki no sosode nos lo atende cu hopi cautela e caso lamentabel. Nos a priminti como hospital cu lo bay investiga kico a pasa y ta haciendo esaki caba n’e momentonan aki, pues e ta andando,” Bakker a indica.

Pa motibo di privacidad di informacion di pashent no ta posibel pa HOH comparti mas informacion detaya di e suceso. Na mesun momento a sigura cu lo haci nan maximo esfuerso pa trece claridad den e caso lamentabel aki.