Despues cu Bon Dia Aruba y otro medio di comunicacion a bin publicando diferente articulo pa loke ta trata e caso di Elida Maria Arteaga Barreto, ayera den oranan di atardi vocero di Hospital Dr. Horacio Oduber, Sra. Charline Huntington, a señala cu hospital presenta un solucion pa e famia.
E noticia aki a wordo confirma na redactor di Bon Dia Aruba ayera den oranan di atardi, unda Huntington a expresa cu “HOH a traha duro riba un solucion cu a presenta na e famia awe y e famia a bay acuerdo cu esaki. Nos ta contento di por yuda e famia te unda nos por.”
E proceso aki pa haya un rapport final ta dura entre 2 pa 3 luna manera el a informa. Tambe redactor a tuma contacto cu mama di Elida, ken a indica cu nan ta spera cu e proceso aki por bay lo mas rapido posibel. Nan ta warda riba e rapport final pa asina nan por haya sa precies den ki circunstancianan Elida Arteaga a muri algun siman pasa.
Manera a bira conoci, dianan pasa e mayornan a paga hospital 300 florin pa por haci e autopsia na e curpa di Elida Maria. Despues nan a confronta e tristo noticia cu autopsia no lo tuma luga, sin ricibi mas detaye, causando hopi indignacion y tristesa.
Luz Marina Barreto, mama di Elida, a expresa cu warda di polis San Nicolas a bis’e cu nan a conclui cu Elida a mata su mes. Minuutnan despues el a haya un yamada di hospital informado cu e autopsia di su yiu no lo tuma luga. “Nan a yama mi y bisa mi cu nan a haci un fout, cu nan ta bay debolbe mi e placa back.”
“A mi kier pidi na esnan concerni, cu mi kier haci e autopsia na mi yiu pasobra pa mi tin hopi inconsistencia den e cosnan cu e tin den su curpa, como huñanan ranca. Solamente mi ta pidi un autopsia pa mi yiu”, el a sigura.
Dianan ta pasa y te ainda e mayornan no ta haya contesta. Segun polis a conclui Elida a comete suicidio, manera e mama ta declara.
