Ayera nochi un tormenta tropical a bira un horcan categoria 1 den Caribe. Ta trata di “Otto” cu a bira e di 15 tormenta tropical di e temporada aki y cu no mester bira un preocupacion pa nos pais, segun Servicio Meteorologico di Aruba (METEO).
E fenomeno aki a wordo forma dialuna den e region zuid west di Caribe dilanti e costanan di Nicaragua y Costa Rica. Ayera tardi Otto tabata situa na 285 kilometer parti zuid oost di e isla Colombiano di San Andres. Ayera merdia e tabata registra biento maximo di 85 kilometer pa ora locual ya caba tabata un señal evidente cu eventualmente por a bira un horcan.
Bon Dia Aruba a tuma contacto cu sr. Bakmayer di METEO a bisa cu e influencia di “Otto” cerca nos ta minimal, practicamente nada. Ya cu e horca aki ta situa leu for di nos isla. Un influencia por ta cu e biento por bira zwak. “E no ta algo particular pa nos”, el a bisa.
Tampoco e direccion di “Otto” no mester ta un preocupacion pa Aruba, sino alcontrario ya cu e ta bayendo direccion zuid west. Bakmayer a bisa cu e pronostico ta cu e fenomeno aki lo bay subi tera banda di Bluefields, Nicaragua.
Posiblemente “Otto” lo bira e delaster horcan di e temporada aki den Atlantico. Sr. Bakmayer a splica cu “Otto” no mester wordo cualifica como un fenomeno singular. El a laga sa cu casi na inicio y final di e temporada di horcan, semper ta wordo presenta e tipo di fenomeno aki den e area di Golfo di Mexico.
Di otro banda, el a bisa cu nos situacion di tempo a stabilisa basta despues di e yobida pisa di diadomingo ultimo. Pero no nos por lubida cu esaki ta e temporada cu awa ta cay riba nos isla y nos por haya awasero local. “No keda straño cu algo lo por forma den madruga cay un tiki…”, el a bisa na e matutino aki.
