(EFE) – Horcan Milton a cobra bida di por lo menos un dozijn di persona y a laga un trayecto di destruccion na momento cu el a pasa door di Florida (Merca), cu a registra tornadonan mortal, inundacionnan serio y unda ainda mas di 3 miyon usuario ta keda sin coriente , ademas di a causa daño calcula na te cu 60 biyon dollar.
Sinembargo, autoridadnan y esnan afecta ta hala rosea cu cierto alivio pa motibo cu “e por tabata pio,” segun a bisa un residente di Fort Myers cu a evacua prome cu e yegada di horcan Milton, cu ta mantene e menasa di ola di tormenta, a dal e centro di Florida cu awaseronan torencial y biento fuerte, despues di a yega tera diaranson anochi na e costa west di e estado como un horcan grandi, categoria 3, y bientonan di te cu 205 kilometer pa ora (120 miya).
Cinco di e 11 morto a tuma luga den e condado di St. Lucie, na Costa di Tesoro, como resultado di tornadonan liga na Milton cu a obliga emiti 116 advertencia di tornado, segun e gobernador di e estado, Ron DeSantis a bisa.
Milton, awor un fenomeno extratropical, a bandona Florida despues di a crusa e estado di west pa oost, aunke expertonan ta adverti cu e costa oost ainda por experiencia awasero pisa y olanan di tormenta.
Presidente di Merca Joe Biden a bisa ayera cu e medidanan implementa pa salba bida “a haci un diferencia,” pero a adverti cu ainda ta mucho trempan pa evalua e daño total causa pa e horcan.
Biden tambe a urgi su predecesor den funcion y candidato republicano actual pa Cas Blanco, Donald Trump, pa bandona desinformacion tocante e contesta di gobierno na horcannan Helene y Milton.
“Busca un bida, homber. Yuda e hendenan aki,” Biden a bisa na Trump directamente durante un aparicion na Cas Blanco.
Servicio Meteorologico Nacional mester a declara un emergencia pa motibo di inundacion repentino den e condadonan Pinellas y Hillsborough, na e costa central west di Florida, debi na e yobidanan intenso cu a keda registra, cu awasero acumula di mas cu 43 centimeter y bientonan fuerte cu a ranca palonan y daknan.
E inundacionnan a obliga ekiponan di ayudo pa bay rescata den embarcacionnan y autonan special residentenan cu tabata atrapa den un compleho di apartamento den e condado di Pinellas.
Casi 7.3 miyon persona cu ta biba den 15 condado a ricibi orden di evacuacion obligatorio, un evacuacion reforsa cu e mensahe cu e tabata “un asunto di bida of morto,” manera presidente Biden a transmiti diaranson.
E reclamo di daño despues cu Milton a pasa door di e costa di Golfo di Florida lo por tin un impacto riba e aseguradonan di entre $50.000 y $60.000 miyon, segun estimacionnan di e sector, cu ta prepara pa absorbe e cifranan aki, segun e diferente calculo duna pa ayera diahuebs.
Sinembargo, e gasto aki lo tin repercusion riba e industria di seguro mundial, e revista Insurance Business ta señala, cu e cifra ta yega te na $60 biyon.
