Horcan Maria a sali di Puerto Rico banda di merdia ayera, a laga bastante destruccion atras den su caminda. Na salida e horcan a mengua te na nivel di categoria 3, cu biento sosteni di 115 miya pa ora (184 km/ora).
E wowo di e horcan a sali di e isla via e costa entre e municipionan Barceloneta y Arecibo. Pa 15:00 di atardo ainda personal di polis y di maneho di Emergencia tabata warda e visto bueno di Servicio Nacional di Meteorologia pa sali pa atende incidente, ya cu ainda tabatin biento duro y yobida fuerte.
Varios riu a inunda, manera riu Fajardo cu a inunda varios comunidad, incluyendo e caso urbano di Fajardo. A reporta varios area inunda, entre otro e partinan cerca di costa, loke tabata previsto caba y a evacua e poblacion di e areanan aki.
Tambe e tormenta fuerte a causa problema di su ministro di coriente tur caminda, lagando practicamente henter e isla sin coriente, y sin perspectiva riba recuperacion pronto.
Den oranan di atardi gobernador Ricardo Rosselló a solicita na president Mericano Donald Trump pa declara Puerto Rico zona di desastre, como consecuencia di e dañonan grave cu e horcan Maria a causa na e isla.
Maria ta continua su ruta cu ta anticipa pa bay den direccion di Turks & Caicos pero por ta mas panort di e islanan aki, di manera cu nan no lo sufri e forsa total di e tormenta. E islanan cu a haya e forsa grandi di Maria, cu consecuencia grave, ta Guadeloupe, Dominica y Puerto Rico.
