Oficialnan di Francia y di Antigua y Barbuda ta bisa cu horcan Irma a tuma bida di 2 hende riba e islanan di St. Barts y St. Maarten y un baby na Barbuda. Den e region awor tin tres horcan activo: Irma, Jose cual ta na caminda pa St. Maarten y e otro islanan Caribense Hulandes tambe, y Katia cu ta den Golf di Mexico.

E daño na St. Maarten ta enorme. Segun Defensa Hulandes e isla aki no ta accesibel, ni via aire ni lama como cu e aeropuerto a haya sla masha duro mes (potretnan). E toren di aeropuerto Frances a cay y lo tuma simannan pa drecha esaki. E piernan y tambe terminal di crucero ta destrui. Pilotonan for di Hulanda ta na caminda pa yuda defensa cu e trabou. E aeropuerto ta solamente habri pa avionnan y helicopternan pa duna e ayudo necesario, pues no pa vuelonan comercial. E biento duro (180 mph) a haci hopi daño pero tambe e lama bruto.

Ayera atardi defensa a tira un bista for dia aire. Tabata trata di un helicopter di e barco Zr.Ms Zeeland. Nan a saca potret di e daño riba e islanan St. Maarten, St. Eustatius y Saba. Nan ta conclui awor cu ta mustra cu St. Maarten a sufri mas. Den waf nan ta mira cu e containernan a bay tur caminda.

Un otro barco ta na caminda esta Zr.Ms. Pelikaan cua lo yega awe tardi cu material pa yuda.

Tin coriente na St. Maarten pero no constante. Hopi cas ta destrui. Na St. Eustatius e daño ta hopi menos. Na Anguila y Barbuda 90 pa 100% di casnan ta destrui.

Tin 10 shelter awor unda hopi hende ta keda, segun ultimo informacion. Prioridad segun Defensa Hulandes ta pa amplia e cantidad di shelter, tene cuenta cu mester prepara riba e siguiente horcan Jose cu nan ta spera e weekend ki.

Ayudo for di Aruba
Instancianan na Aruba tambe ta prepara pa duna mas ayudo y un man. Cruz Cora Aruba lo manda un ekipo di 20 hende mas pa yuda e islanan ruman. Awor nan tin 3 boluntario na St. Maarten. Esunnan cu kier yuda cu donacion, por deposita esaki riba 038.401.0390 Aruba Bank bou nomber Red Cross Aruba, Hurricane Irma.

Segun comunicado di Bureau Rampenbestrijding, e departamento a sinta hunto cu prome minister y instancianan gubernamental pa discuti con Aruba lo por ofrece un man. Entre otro, e instancianan presente tabata Cuerpo Policial, Guarda Nos Costa, Servicio di Malesanan Contagioso y ATA. Durante e encuentro e departamentonan a palabra cuanto personal ta disponibel y cua experticio nan lo por colabora cu ne en caso cu haya un peticion pa ayudo.

Hefe di Bureau Rampenbestrijding Rino Hermans a declara na Bon Dia cu e comunicacion lo bay via nan departamento. “Nos ta wardando pa haya un informe tocante e situacion y e recursonan cu nan lo tin mester di dje. E capacidad cu nos tin ta conoci pa nos y nos ta keda stand by pa e informenan cu ta drenta.”

Personanan na Aruba cu familiarnan riba e islanan afecta ta haya nan mes den un situacion dificil pasobra tuma contacto cu nan familiarnan no ta posibel actualmente. Sinembargo Sr. Hermans ta pidi pa keda pendiente ora cu establece un liña di contacto cu e islanan pa asina habitantenan di Aruba por haya informacion di famianan cu a experiencia e horcan aki.

Prome minister Mike Eman a manda palabra di sosten y solidaridad pa Sint Maarten. “Mi a combersa cu e prome mandatario di e isla durante mi a expresa nos convivencia cu nan y forsa den loke nan ta bay pasa aden. A inform’e tambe con nos ta preparando pa brinda ayudo cu cierto cantidad di material y personal.”

Forsa Maritimo di Reino

Comandante di Forsanan Maritimo den Area Caribense Peter Jan de Vin a bisa cu ‘nos ta tene cuenta cu masha hopi miseria y forma di daño’. E militarnan lo yuda cu orden publico, inventarisacion di e daño y percura pa tin luga pa e habitantenan por sconde. Segun sr. de Vin, e islanan sa pidi sosten militar mas biaha ora tin menasa di horcan.

Riba diaranson anochi e militarnan tin plania pa yega na e tres islanan hunto cu enfermero. Nan lo yega cu un barco di carga, un di stacion, y tambe cu 2 helicopter y un boto di rubber cu por nabega lihe.

E sosten militar por lo pronto lo ta na vigor te cu diadomingo. Segun comandante de Vin, ‘Nos ta conta cu lo pio, pero naturalmente nos ta spera cu lo sali miho di loke a pensa’.

“Na e momento aki ta dificil pa calcula, pero si diahuebs of diabierna nos yega na e conclusion cu e sosten no ta necesario mas, e autoridadnan lo haci e peticion ey tambe”.