(AP) —Residentenan di Florida bibando den areanan riba e costa e haya mandato pa evacua nan cas ayera como cu Horcan Idalia a haya mas forsa den e awanan di e Golfo di Mexico y ta menasa cu yobida extremamente fuerte.
Idalia a gradua pa un horcan Categoria 2 ayera atardi cu bientonan suplando 155 kpo. A pronostica cu e horcan lo yega e costa di Florida awe como un sistema di Categoria 3 cu bientonan suplando 193 kpo den e region di Big Bend, unda e Florida Panhandle ta curva den e peninsula. E resulta por ta un tormenta pisa pa un estado cu ainda ta recuperando for di Horcan Ian cu a tuma luga aña pasa.
E Servicio Nacional di Tempo na Tallahassee a yama Idalia “un evento unico” mirando cu no a registra ningun horcan grandi den e waf di Big Bend. Riba e isla di Cedar Key, Comisionado Sue Colson a uni cu otro oficial di ciudad pa paketa documentonan y aparatonan electronico na City Hall. El a manda mensahe pa casi 900 residente cu tabata bao mandato pa evacua. Mas cu un docena di soldaat di estado a bay porta pa porta advertiendo residente di e tormenta cu por yega te 4.5 meter di haltura.
A habri shelter y a prepara hotel pa tuma hende cu a evacua. Mas cu 30.000 empleado di utility a cuminsa haci reparacion prome cu e horcan dal. Aproximadamente 5.500 soldaat di e Guardia Nacional a ser desplega.
A cuminsa sinti Idalia den Florida Keys y e costa sur-este di Florida diamars atardi, incluyendo Clearwater Beach. Trahadonan na e bar- y tiendanan banda di lama a tapa bentana cu palo, muchanan a skim surf e olanan y hopi hende a mira e lama bira mas bruto.
Despues cu e yega den e region di Big Bend, a pronostica cu Idalia lo crusa e peninsula di Florida y despues dal Georgia y e Carolinas diahuebs. Ambos gobernador Brian Kemp y Henry MsMaster di e dos estado a anuncia estadonan di emergencia, haciendo recursonan y personal disponibel, incluyendo centares di soldaat di Guardia Nacional.
