Horacio Oduber Hospital cu tratamento inovativo pa kehonan orinario: Pa prome biaha ta ehecuta embolisacion di arteria di prostaat den Caribe Hulandes

Riba diahuebs 22 di februari a trata pa prome biaha na Horacio Oduber Hospital dos Embolisacion di Arteria di Prostaat (Prostaat Arterie Embolisatie – PAE) danki n’e cooperacion entre radiologonan di intervencion Mijntje van den Oever di HOH y Sytse Oudkerk di Link2Care Clinics Hulanda. Bentahanan di e tratamento aki pa pashentnan cu tin keho orinario ta e duracion cortico di e tratamento cu ta sosode durante admision di un dia y ta wordo haci sin cu mester bay bou di anestesia. Y e pashent por bay bek cas den cuater ora. Banda di esaki ta importante pa menciona cu e chens pa complicacion (sexual) ta mas chikito compara cu e operacion di prostaat regular (TURP).

Por lo menos un den cada tres hende homber riba 50 aña ta sufri di kehonan orinario. Cerca hende homber kehonan orinario por tin diferente causa pero mayoria biaha ta un aumento benigno (no malo) di e prostaat (BPH). E prostaat cu a aumenta ta pone presion riba e asina yama ‘plasbuis’ y asina causa problema pa orina. Uzo di pilder solamente ta yuda trata e sintomanan, pero no ta yuda gara e motibo original.

Urologo na HOH Randall Leong: “E tratamento di PAE ta un tremendo adicion banda di e conocido operacion yama TURP pa trata pashent cu no por bay bou di anestesia of cu tin un ‘catheter’ permanente di blaas.”

Sytse Oudkerk, radiologo di intervencion na Link2Care Clinics Hulanda: “na Merca y otro paisnan Europeo e tratamento di PAE aki ya pa hopi aña ta wordo haci caba. Na Portugal cerca profesor Pisco, e pionero di e tratamento innovativo aki, mi persona a siña e tratamento aki y alabes a introduci esaki na aña 2022 na Hulanda na nos clinica specialisa na Bilthoven – Utrecht.

Radiologo di intervencion na HOH Mijntje van den Oever: “danki na e colaboracion entre HOH y Link2Care Clinics nos kier haci e tratamento innovativo y importante aki disponibel pa hende homber cu keho orinario na Aruba y pronto pa otro islanan den region.”

Jacco Vroegop, presidente di Hunta di directiva di HOH: “Horacio Oduber Hospital na Aruba ta sinonimo di innovacion, calidad y servicio. Cu e yegada di e tratamento aki nos ta amplia un bes mas nos servicio di cuido medico cu tin un balor grandi pa hopi pashent masculino cu tin e asina yama ‘Benigne Prostaat Hyperplasie’ (BHP). Mi ta sumamente orguyoso cu nos ta e prome hospital den region Caribe Hulandes pa facilita e tratamento aki di PAE. Un otro tremendo paso mas di ful nos team na HOH!”