Camara di Comercio y Industria di Aruba (KvK) ta ripara cu e negoshinan tipo filial a crece debi na Venezolanonan cu ta bin pa haci negoshi riba nos isla. Y cu hopi ta uzando Arubianonan como ‘stroman’ pa por landa negoshi aki.
Secretario Ehecutivo di KvK, Sonia Veldhuizen ta expresa su preocupacion cu hopi hende di Venezuela ta bin pa cumpra companianan di hende local; y nan ta lanta un filial di nan compania na Aruba, specialmente den e area di San Nicolas.
“Tambe e ta peligroso pasobra nos ta ripara cu hopi hende Venezolano ta uza un Arubiano como un stromanschap pa lanta un compania.” Esaki ta nifica cu ta uza e Arubiano como frontman pa lanta e negoshi pero e Arubiano mes no ta envolvi den e negoshi realmente.
Sra. Veldhuizen ta indica cu e tipo di forma aki di afiliacion di compania local cu esun di compania Venezolano pa haci trabou specialisa a crece. Te aworaki aki a wordo 181 filial di e tipo di compania aki.
Nenga di registra
E ta laga sa cu como secretaria di KvK e por nenga di registra nan, si e tin un idea cu ta trata di un stromanschap. Te hasta el a yega scucha e tipo di declaracion cu “e compania ta di un meneer Arubiano, pero nan ta haci e palabracion” E ta haya cu e tipo di tendencia aki no ta bon; pero ainda nos legislacion tin buraco den dje cu ta duna espacio pa bin cu e tipo di maniobra aki. E ta haya cu mester bin cu mas regla y mas herment pa contraresta e tipo di practica aki. Pero nan como KvK por conseha riba e asunto aki, pero nan conseho no ta mandatorio.
Te hasta KvK ta nenga permiso pa companianan cu kier opera como un deposito, caminda tur producto ta wordo ofrece, ya cu e no ta un bon practica comercial. Semper como KvK nan ta nenga e permiso si nan ta haya cu a base di investigacion ta contra siguridad economico.
Secretario di KvK a haci un yamada pa nos hendenan no cay den e tentacion di wordo uza como stromanschap di hendenan di afo pa lanta un compania. Pa nan ta importante pa e hendenan bira consciente di no cay den e tentacion aki cu hendenan di afo cu kier lanta un compania, ya cu bo por haya problema grandi. “Pasobra si e hende di afo ta bay, e ta laga bo atras cu tur debenan di impuesto y otro debenan. Eigenlijk bo tin un problema grandi.”
