ORANJESTAD – Centro di ciudad ta un luga cu mester tin suficiente parkeer pa asina e trafico, cu manera tur hende sa den oranan specifico ta keda pega. E problema ta cu desde 3 aña pasa gobierno a implementa e sistema di parking pa auto, unda lo a garantisa cu un persona por bay centro di Playa por haya un luga di parkeer sigur sin problema.
Actualmente e situacion ta keto bay afectando e ciudadano Arubiano y turistanan, cu no por parkeer auto, ya cu no tin luga. E sistema di parkeer ta diferencia cu e vak blanco pa tur persona ku kier parkeer nan auto y ta paga un tempo di nan preferencia, e vak geel ta pa esunnan cu a haya un abbonnement pa e luga specifico ey, pero e situacion ta cu hopi hende no ta haci uso di nan espacio.
E situacion ta cu na cierto ora ta imposibel pa haya un vak blanco liber, mientras cu na varios luga e vaknan geel bashi ta abunda, cu consecuencia cu hende ta perde hopi tempo y placa coriendo rond buscando un luga bashi, y si no, mester bay para leu di centro pa despues cana unda nan mester bay. Nos a comprende cu e mandatario encarga a nombra un comision pa analisa e situacion y propone solucion. Lamentablemente, no a mira solucion aparece ainda.
Ta di spera cu pronto por haya un solucion pa e problema aki, ya cu tin hopi hende cu ta dispuesto pa paga, basta nan haya un luga pa pone nan vehiculo.
