E problematica, cu turistanan ta purba bandona Aruba cu cocolishi, coral of santa blanco ta sigui. Conforme e tratado international di CITES, e landsbesluit local Natuurbescherming Inheemse Flora & Fauna y e Zandverordening, ta prohibi pa saca y exporta cocolishi, coral y/of santo blanco for di Aruba. Diferente departamento di gobierno ta hunga un rol pa cu e esaki manera Douane, Veterinaire Dienst y Directie Natuur en Milieu.
Ta resalta cu tur dia douane ta intercepta turistanan cu ta bayendo back nan pais, cu cocolishi, santo blanco y coral cu a wordo saca for di nos naturalesa. Esaki ya caba pa lunanan largo ta tumando lugar
E cantidad abnormal di cocolishi, coral y santo blanco confisca ta mustrando den direccion cu ta hende local mes ta ofrece y bendenan cu turistanan. Esaki ta contra ley y tin como consecuencia un multa halto.
E mesun accion aki ta duna un mal ehempel na turistanan cu ta pensa cu si un hende local mes por piki y bende, nan tambe por bay piki nan mes, provocando un acto contra ley sin sa. Na airopuerto ta confisca e material y e turistanan ta haya nan mes confronta cu un multa pisa.
E sorpresa no agradabel aki ta duna Aruba un mal nomber den exterior. Specialmente awo den un temporada dificil unda cu ta net ora mas nos mester tuma responsabilidad pa mustra nos miho banda pa e turistanan. Esey ta inclui nos responsabildad pa respeta nos leynan y nos responsabilidad pa preserva y conserva nos recursonan natural.
Nos naturalesa NO ta pa haci negoshi cune. E ta pa ofrece nos turistanan, nos mes y nos futuro generacion e placer di su beyesa unico. Algo pa ta orguyoso di dje. Su conservacion ta cuminsa na NOS.
