E lista di boet di Ministerio Publico recientemente a wordo comparti varios biaha riba Facebook. Ciudadanonan a reacciona riba e sumanan cu ta cuminsa for di 50 florin y bay te 1000 florin, segun e resumen di boetnan. Ministerio Publico a duna di conoce cu den caso cu hende no paga e boet 50% por bin acerca.
Bon Dia Aruba a puntra vocero di Minsterio Publico Sra. Ann Angela, a base di kico ta dicidi cuanto un boet mester ta, por ehempel pasa den luz cora ta 250,- dicon no mas hopi of mas tiki. El a splica cu esaki ta a base di un Instruccion di Procurador General, den cual ta sigui e richtlijnen di verkeershandhaving a base di e ley di reglanan di trafico. El a sigui bisa cu no ta mucho tempo cu tin e instruccionnan aki, e instruccion aki ta apenas algun aña bieu. E sumanan a wordo adapta pa haci nan mas efectivo.
Recientemente un ciudadano a acerca nos matutino disgusta door di a ricibi un boet pa no uza su richtingaanwijzer. E motibo ta cu no tabatin ningun auto e momento ey y no tabata riba caminda ‘grandi’ tampoco, y na su opinion polis por a djis dun’e un advertencia y hala su atencion na e asunto y no mester a dun’e boet. E ciudadano ta cuestiona con e ta haya un boet den un area asina, mientras cu diariamente tin hende ta kibra reglanan di trafico riba rotonde of na crusadanan conoci pa ta peligroso. Sinembargo na e sitionan ey, nunca ta mira polis.
Cumplimento boetnan
Considerando e storia di e ciudadano a puntra Sra. Angela con ta bayendo cu cumplimento di boet di ciudadanonan y si hopi ta paga prome cu hiba nan hues of cu nan mes bay bringa esaki na hues? Sra. Angela a indica cu mester corda cu si hende laga e boet bay hues di trafico, ta bin 50% acerca.
Si Bo a haya un boet y bo no ta de acuerdo cu ne, e ora bo por bringa e boet dilanti hues. Ta importante pa sa cu den e caso ey Ministerio Publico lo para contra bo den Corte y lo exigi un boet mas halto. Si Bo a ricibi un kennisgeving schikkingsvoorstel y Bo no ta acuerdo cu e boet, Bo por haya un citacion despues cu e termino di pago pasa. Un citacion ta un carta di fiscal den cual ta describi di kico Bo ta wordo sospecha. Tambe ta menciona un fecha riba cual bo mester presenta dilanti hues. Bo por paga bo boet ainda te dos dia prome cu e fecha ey of scoge pa spera e exigencia di Ministerio Publico dilanti hues. Den tur dos caso hues lo finalmente determina e suma cu Bo mester paga. Hues por scoge pa duna bo un suma mas halto of mas abao cu e suma cu bo a ricibi hues por sigui e exigencia di Ministerio Publico, pero esey no ta obliga. Banda un suma di placa hues por tambe determina dia(nan) di detencion alternativo. Esey ta e castigo di prizon cu bo tin cu sinta si Bo no paga e boet determina pa hues.
“Hopi ta bin paga. Ta semper posibel pa haci areglo si ta trata un suma hopi halto. Otronan ta bay hues. Tin ta bring’e. Tin biaha nan ta haya rason, tin biaha nos ta haya rason. Tin ta purba pa keda sin paga y e ora CEA ta yega na nan cas pa cobra nan (of hiba nan KIA pa nan sinta nan dianan).
E boetnan cu mas ta wordo duna ta e overtredingnan manera di no tin faha di siguridad bisti, no a haci uzo di richtingaanwijzer, para riba strepi, pasa den luz cora, etcetera, segun Sra. Angela. Concluyendo el a bisa cu tur e placa cu ta drenta door di boet ta bay bek den caha di Pais Aruba.
